Kryeministri i Spanjës, Pedro Sanchez, ka deklaruar se shteti ka për detyrë të mbrojë demokracinë dhe fëmijët nga ajo që ai e përshkroi si “bota toksike dhe e pandëshkuar” e mediave sociale. Deklarata u bë të enjten gjatë seancës përmbyllëse të Kongresit të 8-të Kombëtar të Industrisë, të mbajtur në Bilbao, transmeton Anadolu.
Sanchez mbrojti planet e qeverisë së tij për të shtrënguar rregullimin e platformave digjitale, me theks të veçantë në mbrojtjen e të miturve. Ai tha se fuqia e shtetit ekziston për të mbrojtur demokracitë nga sulmet që ato pësojnë, si dhe për të garantuar sigurinë dhe mirëqenien e fëmijëve dhe adoleshentëve në hapësirën digjitale.
“Fuqia e shtetit është aty për të mbrojtur demokracitë dhe gjithashtu fëmijët dhe adoleshentët nga ajo botë toksike dhe e pandëshkuar që, për fat të keq, është bërë media sociale”, u shpreh Sanchez, sipas raportimit të medias spanjolle La Voz de Asturias.
Komentet e tij vijnë në një kohë tensionesh me figura të rëndësishme të industrisë së teknologjisë, lidhur me propozimin e qeverisë spanjolle për të kufizuar aksesin në mediat sociale për fëmijët nën moshën 16 vjeç. Kryeministri iu përgjigj në mënyrë indirekte kritikave të bashkëthemeluesit të Telegram-it, Pavel Durov, i cili paralajmëroi se rregulloret e planifikuara mund të kërcënonin “liritë e internetit” dhe ta shndërronin Spanjën në një “shtet mbikëqyrës”.
Sanchez u përball gjithashtu me kritika nga pronari i platformës X, Elon Musk, i cili e kishte etiketuar atë si “fashist totalitar” dhe “tiran”. Kryeministri spanjoll i hodhi poshtë këto akuza, duke theksuar se rregullimi nuk duhet të ngatërrohet me censurën apo autoritarizmin.
“Pyetja kryesore është: për çfarë e duam inovacionin teknologjik? Për të zgjeruar të drejtat apo për t’i vënë ato në rrezik? Për të forcuar demokracinë apo për ta gërryer atë?”, tha ai.
Sanchez kritikoi fuqinë e pakontrolluar të elitave teknologjike, duke i akuzuar ato për përhapjen e dezinformatave dhe shfrytëzimin e të dhënave personale. Ai theksoi se shoqëritë demokratike nuk duhet t’i nënshtrohen interesave të “tekno-oligarkëve të algoritmit”, duke përfunduar se përgjigjja ndaj këtij modeli duhet të jetë “një jo e qartë”.
