Motra e vogël e gruas së ish kryeministrit britanik, Tony Blair, Laurent Booth në vitin 2010 kishte pranuar islamin. Në një intervistë për agjencinë Anadoll ajo ka treguar se në një vendim të tillë, ndikim të jashtëzakonshëm kishte pasur edhe udhëtimi i saj në Palestinë, përkatësisht guximi i popullit palestinezë.
Katërdhjetë e shtatë vjeçarja Laurent Booth është motra me e re e gruas së Tony Blair, Cherie.
Booth ka tërhequr vëmendjen e publikut me kritikat e saj ndaj SHBA-ve dhe Izraelit, rreth qasjes së tyre ndaj problemit në Gaza.
Duke theksuar se SHBA-të po e armatosin Izraelin dhe se nuk kanë dënuar sulmet izraelite, Booth mendon se Britania e Madhe duhet të rishikojë marrëveshjet me Izraelin në aspektin ushtarak.
“Është e qartë se marrëveshjet nuk mund të anulohen, por vetë deklarata e qeverisë britanike se do të rishikojë marrëveshjet me Izraelin, tregon për prezencën e presionit, gjë që është pozitive. Sulmet izraelite në Gaza mund të ndalohen me intervenimin e OKB-së dhe me sanksione ndaj Izraelit. Populli i Gazës është në të drejtën e vetë dhe vullnetin e Zotit dhe për këtë nuk do të dorëzohet ndaj kriminelëve”, citohet të ketë thënë Booth.
Booth vlerëson se është e frikshme të shikosh fëmijët e plagosur, duke akuzuar Izraelin se qëllimshëm po punon në “gjymtimin e kombit palestinez”, raporton klix.ba, transmeton Telegrafi.
“Përgjegjësia për këtë qëndron në supet e gjithë botës. Plagosja e çdo fëmije është një turp për të gjithë ne”, ka thënë ajo.
Booth, gjatë vitit 2008 ka qenë disa herë në Gaza dhe secilën herë ka udhëhequr konvoje me ndihma humanitare për banorët e atjeshëm.
Ajo gjithashtu është njëra ndër themelueset e organizatës humanitare “Peace Trial“, e cila është aktive në Gaza.
Duke shprehur dëshirën për të vizituar përsëri Gazën, Booth ka shprehur besimin se Gaza me siguri do të rindërtohet.
Duke folur rreth vendimit të saj për pranimin e islamit, Booth ka treguar se ndikim të madh në këtë kanë pasur edhe vizitat e saj në Gaza, përkatësisht ato çfarë ka parë atje.
“Kam parë guximin e popullit palestinezë. Kjo më ka bërë që të mendoj për arsyet se pse kemi ardhur në këtë botë. Falënderojë palestinezët që më kanë mësuar rreth kësaj”, ka treguar Booth.
Duke kritikuar bashkësinë ndërkombëtare për mos reagimin në Gaza, Booth ka shtuar se vlerëson reagimin e kryeministrit turk rreth zhvillimeve në Gaza.
Booth gjithashtu ka kritikuar edhe burrin e motrës së vetë, Toni Blair, për siç ka thënë ajo “nuk po e bënë punën për të cilën është thirrur”.
“Blair ndoshta është në Bahama për pushime. Populli palestinezë nuk ka kurrfarë përfitimi nga ai dhe për këtë ai duhet të jap dorëheqje nga funksioni i tij si përfaqësues special për Lindjen e Mesme”, ka vlerësuar Booth. /Telegrafi/