Gjatë fundjavës, mora një telefonatë nga një mik i vjetër, i cili e gjente veten në një nga udhëkryqet e jetës.
Disa muaj më parë, ai bëri atë që dukej si një lëvizje e mençur në karrierë: la pozicionin e tij të rehatshëm në një nga katër firmat më të mëdha të kontabilitetit në Mbretërinë e Bashkuar, për t’iu bashkuar zyrës së tyre në Lindjen e Mesme. Përtej avantazheve në karrierë, ai kishte bërë disa qëllime shumë të bukura: të kryente Haxhin, të ishte më afër Mekës dhe Medinës, ta zhvendoste familjen e tij në një mjedis më islamik dhe të kalonte më shumë kohë me prindërit e tij të moshuar në Pakistan.
Por pas dy muajsh në pozicionin e tij të ri, ai po pendohej.
Zyra e re rezultoi të ishte një makth: një shef toksik dukej i vendosur t’ia bënte jetën të mjerueshme. Politikat e zyrës kërcënonin t’i shkatërronin karrierën. Vetë mundësia që ai mendoi se do ta afronte me qëllimet e tij personale dhe profesionale, tani po i rrezikonte gjithçka.
“Nuk mund të kthehem në Britani, tashmë kam dhënë dorëheqjen,” më tha ai, me një zë të rënduar nga zhgënjimi. “Mund të humbas edhe këtë punë. Nuk di çfarë të bëj.”
Ndërsa po diskutonim opsionet e tij, e gjeta veten duke i bërë një pyetje të thjeshtë që e ndryshoi të gjithë bisedën tonë:
“Cili ishte qëllimi yt numër 1 për këtë lëvizje?”
“Të kryej Haxhin,” u përgjigj ai pa hezitim.
“Ke edhe rreth 10 muaj deri në Haxh,” i kujtova unë. “Fokusohu te kjo për momentin, dhe pas Haxhit, hajër qoftë! Allahu mund të të hapë dyer të papritura.”
Në atë moment, diçka u bë e qartë për të dy ne. Kur ke një qëllim të qartë dhe të përqendruar tek Allahu, kjo nuk i eliminon vështirësitë, por të jep një kornizë për t’i kaluar ato.
I thashë se ndoshta ky shef i vështirë, ky mjedis toksik, mund të jenë të gjitha pjesë e sprovës. Allahu po teston sinqeritetin e tij: A do t’i qëndrojë ai rrugës kur gjërat të bëhen të vështira, apo do ta braktisë qëllimin e tij që në shenjën e parë të vështirësisë?
Të gjithë e dimë se veprat gjykohen sipas qëllimeve (nijeteve), por kam mësuar se qëllimet na japin gjithashtu forcën për të ngulmuar përmes sfidave të pashmangshme që ato veprime sjellin me vete.
Nëse po përballeni me një situatë të vështirë pikërisht tani, qoftë një udhëkryq në karrierë, sfida në marrëdhënie, ose thjesht ndiheni të humbur në lidhje me hapat tuaj të ardhshëm, pyesni veten:
Cili është qëllimi im i vërtetë këtu? Dhe si mund ta lidh këtë qëllim me shërbimin ndaj Allahut (xh.sh)?
Mikut tim ende do t’i duhet të përballet me situatën e tij të vështirë në zyrë. Shefi toksik nuk do të kthehet në një mik të ngrohtë brenda natës. Politikat e zyrës nuk do të zhduken si me magji. Por diçka mund të ndryshojë në mënyrën se si ai i qaset secilës ditë.
Kur udhëhiqesh nga një qëllim i përqendruar te Zoti dhe jo te rrethanat, ti pushon së pyeturi “Pse po më ndodh kjo mua?” dhe fillon të pyesësh “Si mund t’i shërbej Allahut (xh.sh) përmes kësaj sfide?”
Herën tjetër kur jeta t’ju sjellë një sfidë të papritur, mos u fokusoni vetëm në zgjidhjen e problemit të momentit. Bëni një hap prapa dhe rilidhuni me qëllimin tuaj më të thellë. Le të jetë ai qëllim Kibla juaj, duke ju udhëhequr përmes çfarëdo stuhie që keni përpara. Allahu na dhëntë qëllime të sinqerta dhe forcën për t’i ndjekur ato, pavarësisht pengesave me të cilat përballemi. Amin.
Nga Productivemuslim
