Të gjithë parametrat aktualë ekonomikë paralajmërojnë një krizë të rëndë ekonomike në muajt në vijim, sado që zyrtarët e Qeverisë në largim po mundohen disi ta mohojnë një gjë të tillë, sado që deklaratat e tyre në opinion e thonë të kundërtën.
Deklarata publike e para pak ditëve e ministrit në largim të Financave, Besim Beqaj, rreth rënies së përqindjes së rritjes ekonomike të vendit, nga 4,5 në rreth 2,5 për qind për vitin 2014, flet fare qartë se shteti tashmë ka hyrë në rrugën e rrezikshme, e cila edhe do të lë pasoja të rënda, në një ekonomi të pazhvilluar siç është kjo e jona.
Prej 8 qershorit të këtij viti, Kosova është në bllokadë totale, si në aspektin politik, por aq më shumë edhe në atë ekonomik.
Por, zvarritjet e mëtutjeshme në formimin e institucioneve të reja edhe më shumë po e keqësojnë gjendjen ekonomike në vend.
Por, përkundër kësaj PDK-ja, në njërën anë, si dhe Blloku i partive opozitare në anën tjetër, vazhdojnë të mbajnë qëndrime krejtësisht të kundërta kundrejt njëra-tjetrës.
Që të dyja po synojnë formimin e qeverisë së re. Së paku deri më tash, PDK-ja ligjërisht e ka mandatin për formimin e institucioneve, por i mungojnë numrat, e Blloku i partive opozitare i ka numrat e nevojshëm, por shansin për ta provuar formimin e institucioneve ia ka mohuar kryetari i Gjykatës Kushtetuese, Enver Hasani.
E derisa po vazhdon kjo lojë e rrezikshme politike, investimet e huaja në vend po bien dita-ditës e klima për të bërë biznes po keqësohet nga ora në orë.
Bizneset prodhuese po rrezikohen në vazhdimësi e tregtarët, të lidhur ngushtë me partinë në pushtet, po i trashin kuletat e tyre duke sjellë në treg produkte të dyshimta nga Serbia.
Sipas të dhënave të fundit të Ministrisë së Financave, shihet shumë qartë se gjatë tetëmujorit të parë të këtij viti kemi një realizim negativ të investimeve kapitale, por edhe të të hyrave të planifikuara nga Dogana dhe Administrata Tatimore e Kosovës.
Nga 543 milionë euro, sa janë të parapara sivjet për t’u shpenzuar në emër të investimeve kapitale, deri në fund të gushtit janë shpenzuar rreth 195 milionë euro apo 35,9 për qind e shumës së paraparë.
Gjatë muajit prill, në Kosovë, në emër të shpenzimeve kapitale u harxhuan 46 milionë euro. Ndërkaq, në muajin gusht, shuma e mjeteve të shpenzuara në emër të kësaj kategorie u përgjysmua, duke arritur në 23 milionë euro. Shumë keq po qëndron situata edhe më inkasim të të hyrave.
Administrata Tatimore e Kosovës me projeskisonin buxhetor deri në fund të vitit duhet të inkasojë 367 milionë euro. Por, deri në fund të muajt gusht ka arritur të inkasojë 201 milionë euro apo të zbatojë rreth 54,7 %. Po ashtu, gjatë muajit prill, ATK-ja ka mbledhur hiç më pak se 37 milionë euro e në muajin gusht vetëm 19 milionë euro.
Puna hiç më e mirë nuk po qëndron as në Doganën e Kosovës, ku kjo e fundit deri në muajin gusht ka arritur të mbledhë 55 milionë euro nga 934 sa iu është caktuar me buxhetin e këtij viti. Shikuar në përqindje gjatë këtij tetëmujori Dogana ka realizuar 58,9 për qind të planit. Andaj, formimi sa më i shpejtë i institucioneve të reja është i domosdoshëm për ta ndalur këtë trend negativ për ekonomin e vendit. Por, nëse zvarritja vazhdon edhe më tutje, atëherë shteti po ecën sigurt rrugës së Greqisë.
