Shkëputja e kontratave me disa kompani, të cilat janë vlerësuar si të papërgjegjshme, ishte informacioni më i rëndësishëm që kishte ardhur nga drejtorët e drejtorive, në mbledhjen e Këshillit të Drejtorëve të komunës së Mitrovicës.
Fillimisht shefja e kabinetit të kryetarit të Komunës, Selvie Kurti, u ka kërkuar drejtorëve të drejtorive që në afatin sa më të shkurtër t’i dorëzojnë kërkesat e tyre lidhur me planifikimin e personelit të nevojshëm për vitin 2015, sepse, në të kundërtën, ajo tha se kërkesat nuk do të mundë të realizohen.
Drejtori i Prokurimit, Besnik Beka, tha se ka iniciuar shkëputjen e kontratës me disa kompani, të cilat nuk janë duke i plotësuar kushtet e kontratave, përkatësisht nuk janë duke i plotësuar nevojat e administratës komunale në bazë të kontratës së nënshkruar. “Janë tri kompani për momentin, me të cilat duhet t’i shkëpusim kontratat, për shkak se ato nuk po i kryejnë obligimet e tyre sipas kontratave të nënshkruara. Kjo është punë e kryer dhe në harmoni të plotë me ligjin dhe kontratën dhe për këtë përgjegjësia bie mbi kompanitë, të cilat nuk po i plotësojnë kërkesat dhe nevojat e komunës, në bazë të kontratës së nënshkruar, për ç’arsye në administratën komunale po paraqiten shumë probleme”, tha Beka.
E ndërkaq, Naim Hajra, drejtor i Drejtorisë së Inspektoratit, theksoi aksionin për lirimin e hapësirave publike nga shitësit dhe mallra.
“Kemi liruar pothuajse të gjitha hapësirat publike para lokaleve e dyqaneve. Qytetarët e kanë mirëpritur aksionin tonë dhe kërkojnë që kështu të jenë vazhdimisht të lira hapësirat publike. Edhe dislokimi i kombi-taksive në afërsi të palestrës së sporteve është treguar mjaft efektiv. Kështu do të veprojmë edhe me taksitë që qëndrojnë në afërsi të Xhamisë së Zallit, por kjo do të bëhet pasi të sigurohen hapësira të caktuara, të përshtatshme për taksitë”, theksoi Hajra.
Drejtoresha e Arsimit, Ajmane Barani, bëri të ditur se procesi i përzgjedhjes së drejtorëve në disa shkolla të mesme dhe fillore të Mitrovicës ka shkuar mirë, ndërsa shtoi se janë zgjidhur edhe disa probleme që kanë ekzistuar në disa shkolla të komunës së Mitrovicës.
Nënkryetari i Komunës, Safet Kamberi ka njoftuar për rrjedhën e projektit për rregullimin e varrit të atdhetarit dhe patriotit Sherif Tërstena. Sipas tij, përurimi i kompleksit të varrezave të Tërstenës, ku gjendet edhe varri i Sherif Tërstenës, do të bëhet më vonë.