Kryeministri i Spanja, Pedro Sánchez, po pozicionohet gjithnjë e më qartë si një kundërfigurë ndaj Donald Trump, duke ndjekur një qasje të pavarur në politikën e jashtme dhe të brendshme.
Në fillim të misionit ushtarak të SHBA-së kundër Iranit, qeveria spanjolle refuzoi përdorimin e bazave ushtarake dhe, më pas, edhe hapësirës ajrore për avionët amerikanë. Qëndrimi i Sánchez-it u përmblodh me mesazhin e qartë “jo luftës”. Ai theksoi se, pavarësisht kritikave ndaj regjimit iranian për shkelje të të drejtave të njeriut, ndërhyrja ushtarake vetëm sa përkeqëson situatën dhe bie ndesh me të drejtën ndërkombëtare.
Kjo qasje shkaktoi reagim të fortë nga Trump, i cili madje përmendi mundësinë e tarifave ndëshkuese ndaj Spanjës. Megjithatë, Sánchez deklaroi se vendi i tij nuk do të “ndjekë me servilizëm” SHBA-në. Ky qëndrim përputhet me traditën e partisë së tij socialdemokrate, PSOE, e cila historikisht ka pasur marrëdhënie të ndërlikuara me SHBA-në.
Edhe opinioni publik spanjoll duket se mbështet këtë linjë. Sipas një sondazhi të gazetës El País, vetëm 23% e qytetarëve mbështesin ndërhyrjen ushtarake kundër Iranit. Një faktor tjetër i rëndësishëm është partneri i koalicionit, Sumar, i cili kundërshton rritjen e shpenzimeve ushtarake dhe çdo mbështetje për operacione të tilla.
Në planin e brendshëm, qeveria e Sánchez-it ka ndërmarrë politika që e dallojnë më tej nga qasja e Trump-it. Ajo ka ofruar mundësi legalizimi për rreth 500 mijë emigrantë pa dokumente, duke kontribuar edhe në rritjen ekonomike, veçanërisht në sektorët e ndërtimit dhe turizmit.
Ndërkohë, përplasjet me figurat e mëdha të teknologjisë janë shtuar. Pas përpjekjeve të qeverisë për të kufizuar përdorimin e rrjeteve sociale për të miturit, Elon Musk e quajti Sánchez-in “tradhtar të popullit spanjoll”.
Megjithatë, opozita, e udhëhequr nga Alberto Núñez Feijóo, e akuzon kryeministrin se po rrezikon sigurinë kombëtare për përfitime politike.
Pavarësisht kritikave, qasja e Sánchez-it po i sjell përfitime politike dhe ekonomike, ndërsa vendi i afrohet zgjedhjeve të përgjithshme të vitit të ardhshëm. Në këtë kontekst, përplasjet me figura si Trump apo Musk mund të shihen nga ai më shumë si avantazh sesa si problem.
