Sylejman Ramqaj
(15.03.1929-13.04.1999)
Sylejman ef. Ramqaj ka lindur më 15 mars 1929 në fshatin Studenicë të Istogut, nga babai mulla Malushi dhe nëna Dyka.
Shkollën fillore katërklasëshe e ka mbaruar në Vrellë në vitin 1944 te mësuesi i shquar Hysni Zajmi. Më pastaj ka vazhduar mësimet në medresenë “Atik” të Pejës.
Ka punuar imam i Ramazanit në fshatin Cërrcë deri në vitin 1972. Nga viti 1972 e deri më 1999 ka shërbyer imam në xhaminë e fshatit të tij – Studenicë.
Sylejman³⁷ efendiu është vrarë në shtëpinë e tij në Studenicë më 13 prill 1999. Kufomën e tij forcat serbe e kishin hedhur në bunar, nga është nxjerrë pas kthimit të popullatës në vatrat e tyre, dhe është varrosur në varrezat e fshatit, ku është lapidari për martirët e Studenicës në Luftën e fundit në Kosovë.
Ka lënë pasardhës 5 djem e 1 vajzë.
——————————————————————
³⁷Shënimet për Sylejman ef. Ramqajn janë marrë më datë 20 qershor 2009 në fshatin Studenicë, nga Xhelal Ramqaj, i biri i mulla Sylejmanit dhe në prani të kryetarit të Këshillit të Bashkësisë Islame të Istogut, Muhamet ef. Lipa, dhe të imamit të fshatit Strudenicë, Avni ef. Gorqaj.
