Ishin nisur për Beograd nga Prizreni. Por përveç udhëtarëve shoferi dhe ndihmësi i tij në autobus kishin fshehur diçka ilegale. Tek motori i autobusit ata kishin fshehur 23 kilogramë drogë të gjithë në paketime.
Doganat e Kosovës kanë njoftuar se të shtunën në pikën kufitare në Merdarë është ndaluar autobusi i cili dyshohej se po barte mallra ilegale.
Sipas njoftimit nga doganat, të shtunën, rreth orës 23, në pikëkalimin kufitar të Merdarës është ndaluar për kontroll autobusi i linjës Prizren – Beorgrad.
Autobusi është ndaluar gjatë daljes nga Kosova. Ky autobus është dërguar për kontroll më të detajuar në terminalin doganor pasi që oficerët doganor dhe policor kanë dyshuar për mallra ilegale të cilat potencialisht mund të ishin të fshehura në brendi të autobusit”, thuhet në njoftim të Doganave.
Sipas njoftimit, gjatë kontrollit detal janë përdorur edhe pajisjet ndihmëse si Fibroskopin dhe Busterin, përmes të cilave është arritur të identifikohen në pjesën e pasme të autobusit, saktësisht tek pjesa e motorit dy çanta të dyshimta.
“Në çanta janë gjetur 22 paketime që dyshohet të jetë substancë narkotike canabis sativa. Pas hapjes është konstatuar se sasia është rreth 23 kg. Menjëherë janë arrestuar vozitësi dhe ndihmës vozitësi që të dy shtetas të Kosovës”, njoftohet nga Doganat. /Tribuna/
