Në një shkrim të fundit për New York Times, analisti Thomas L. Friedman kritikon ashpër kryeministrin izraelit Benjamin Netanyahu, duke theksuar se politika e tij e ekstremit të djathtë po dëmton rëndë interesat e SHBA-së, sigurinë e hebrenjve në mbarë botën dhe vetë ekzistencën e Izraelit si shtet.
Friedman argumenton se Netanyahu përdor kërcënimin iranian si një mjet shpërqendrimi për të mbajtur presidentin Trump dhe liderët hebrenj amerikanë të fokusuar tek raketat, ndërkohë që, në prapaskenë, ndjek një agjendë radikale që përfshin aneksimin e Bregut Perëndimor dhe qëndrimin e përhershëm në Gaza. Politikat e tij, sipas Friedman, janë një “pështyrje në fytyrë” ndaj Amerikës, duke i trajtuar aleatët si “budallenj”, ndërsa Izraeli po shndërrohet në një shtet që ngjason me aparateidin e Afrikës së Jugut.
Analisti vë në dukje se përpjekjet për të kontrolluar miliona palestinezë pa u dhënë të drejta politike janë po aq të pamundura sa do të ishte aneksimi i Meksikës nga SHBA. Ai gjithashtu paralajmëron për një ndryshim të rrezikshëm te votuesit amerikanë: sondazhet tregojnë se shumica e republikanëve të rinj dhe progresistëve demokratë janë kundër ndihmës ushtarake të pakushtëzuar, duke rrezikuar të kthejë Izraelin në një “shtet të përjashtuar”.
Friedman thekson se rreziku më i madh për Izraelin nuk vjen nga Irani, por nga brenda. Politikat e Netanyahut për të dobësuar sistemin gjyqësor, politizuar shërbimin civil dhe mbështetur fanatikët mesianë shërbejnë për të ruajtur pushtetin personal dhe për të shmangur gjyqet për korrupsion.
Ai kritikon gjithashtu bllokimin e qëllimshëm të zgjidhjes me dy shtete, duke fuqizuar Hamasin për të mbajtur të përçarë udhëheqjen palestineze. Friedman përfundon duke theksuar se fajin për humbjen e demokracisë dhe unitetit hebre nuk e ka Teherani, por qeveria e Netanyahut, e cila po sakrifikon të ardhmen e vendit vetëm për të mbajtur pushtetin.
