Një grup alpinistësh të huaj ka nisur të mërkurën një mision shpëtimi për kampionen dy herë olimpike në biatlon, Laura Dahlmeier, disa ditë pasi sportistja gjermane u plagos rëndë nga një rrëshqitje gurësh në një mal në Pakistan.
Sipas një deklarate nga ekipi i saj, e publikuar në rrjetet sociale zyrtare, aksidenti ndodhi të hënën rreth mesditës, në një lartësi prej 5,700 metrash në majen Laila Peak, në vargmalin Karakoram.
Partnerja e saj e ngjitjes arriti të dalë e sigurt dhe të sinjalizojë për ndihmë.
“U përcaktua se një shpëtim me helikopter nuk është i mundur,” – tha për AFP zyrtari lokal Areeb Ahmed Mukhtar, nga distrikti Ghanche, ku ndodhet maja mbi 6,000 metra.
“Kushtet në lartësinë ku ajo u plagos janë jashtëzakonisht të vështira dhe një ekip alpinistësh të huaj do të nisë një operacion shpëtimi tokësor sot,” shtoi ai.
Agjencia “Shipton Trek & Tours Pakistan”, që organizoi ekspeditën, konfirmoi misionin tokësor të shpëtimit të udhëhequr nga katër alpinistë – tre amerikanë dhe një gjerman.
Sipas ekipit të saj, 31-vjeçarja u “godit nga gurë që ranë nga lart”, dhe deri më tani askush nuk ka mundur të arrijë te ajo për shkak të rrezikut të rrëshqitjeve të mëtejshme dhe izolimit të vendngjarjes.
Një helikopter arriti të fluturojë mbi zonën ku ndodhet alpinistja dhe sipas ekipit të saj:
“U vu re se alpinistja me përvojë është të paktën e plagosur rëndë”.
Por, “nuk u vërejtën shenja jete”, thuhej në deklaratë.
Zyrtari i emergjencave në rajon, Muhammad Ali, i tha AFP-së se moti ka qenë “jashtëzakonisht i ashpër” për një javë me shi, erëra të forta dhe re të dendura, gjë që e ka bërë të pamundur ndërhyrjen ajrore.
Një alpiniste me përvojë dhe kampione botërore
Laura Dahlmeier, një alpiniste me përvojë, ndodhej në rajon që nga fundi i qershorit dhe kishte arritur të ngjitej në Great Trango Tower, një tjetër majë sfiduese në Pakistan.
Unioni Ndërkombëtar i Biatlonit (IBU) deklaroi se:
“Po mendon për Dahlmeier-in dhe familjen e saj, me shpresën se së shpejti do të dalin lajme të mira.”
Dahlmeier ka fituar shtatë medalje të arta në kampionatet botërore dhe në Lojërat Olimpike Dimërore 2018 në Pyeongchang, ajo u bë biatlonistja e parë femër që fitoi si sprintin, ashtu edhe garën me ndjekje në të njëjtat lojëra.
Ajo u tërhoq nga sporti profesional në vitin 2019, në moshën 25-vjeçare. Më pas punoi si komentatore për ZDF-në gjermane dhe u përkushtua ndaj alpinizmit.
Laura është gujde e certifikuar për male dhe ski, dhe një anëtare aktive e shërbimit të shpëtimit malor, sipas ekipit të saj.
Gjendja e saj aktuale mbetet e pasigurt, por përpjekjet për ta shpëtuar vazhdojnë me shpresë në terren ekstremisht të rrezikshëm dhe në kushte moti të pafavorshme.
