Kreu i Agjencisë së Sigurimeve të Depozitave të Indonezisë, Anggito Abimanyu, deklaroi se kriptomonedhat bien në kategorinë “jo-hallall”, sipas raportimeve të mediave lokale, transmeton Anadolu.
Anggito sqaroi se deri më sot nuk ekziston asnjë fetva apo vendim nga autoritetet e Sharias që të konfirmojë se kriptomonedhat janë në përputhje me parimet islame të transaksioneve. Sipas tij, mungesa e një baze të qartë fetare dhe e aseteve themelore i bën ato problematike nga këndvështrimi islam.
“Kriptoja deri më sot nuk ka pasur asnjë fetva Sharia. Nuk ka përmbushur kushtet e Sharias sepse nuk ka [asete] themelore”, tha Anggito, cituar nga “Jakarta Globe”. Ai theksoi se, sipas ligjit islam, transaksionet duhet të lidhen me asete të prekshme për t’u konsideruar hallall, pra të lejuara.
Duke folur në emisionin e biznesit “Investor Daily Roundtable”, Anggito shtoi: “Kriptomonedhat kanë të bëjnë vetëm me para që qarkullojnë dhe shndërrohen në bitcoina. Prandaj kriptoja është në kategorinë jo-hallall”.
Megjithatë, tregu i kriptoaseteve në Indonezi ka shënuar rritje të ndjeshme. Gjatë vitit 2025, transaksionet me kripto arritën në rreth 482,23 trilionë rupiah (rreth 28,8 miliardë dollarë). Pavarësisht këtij volumi të madh financiar, kriptomonedhat ende nuk kanë marrë një fetva zyrtare nga Këshilli i Ulemave të Indonezisë që do të përcaktonte statusin e tyre përfundimtar në aspektin fetar.
Vlen të kujtohet se në vitin 2021, Këshilli i Ulemave të Indonezisë e shpalli përdorimin e kriptomonedhave si monedhë “haram” (të ndaluar), duke argumentuar se ato karakterizohen nga pasiguri e lartë dhe rrezik potencial për dëme.
Deklaratat e fundit të Anggito Abimanyut rikthejnë në vëmendje debatin mbi përputhshmërinë e kriptomonedhave me parimet e financës islame, në një kohë kur përdorimi i tyre po zgjerohet me ritme të shpejta në tregjet globale.
