Analizat e Asociacionit të bastoreve sportive në Maqedoni kanë treguar se kah fundi i vitit 2013 ka pasur rreth 400 bastore sportive në 8 rregullues të lojërave të fatit, në të cilat atëherë kanë punuar 2500 persona. Vlerësohet se rreth 30 mijë vende të punës, janë të lidhura me lojërat e fatit.
Ky Asociacion thekson se 46 për qind e popullatës në Maqedoni luan bixhoz.
Sipas studimit të Qendër për hulumtime dhe krijimin e politikave në Shkup, tregohet se në vitin 2007, 37 për qind e popullatës në Maqedoni kanë luajtur bixhoz, pasi bastoret sportive ishin bërë një “eufori nacionale”, shkruan DW, transmeton “Zhurnal”.
Në vitin 2005 ka pasur 79 bastore sportive, kurse në vitin 2007 ka pasur rreth 100 bastore.
Rreth 74 për qind e qytetarëve që kanë të ardhura më pak se të ardhurat mesatare, kanë qenë vizituesit më të mëdhenj të bastoreve sportive.
Thuajse shumica e bastoreve sportive dhe kazinove punojnë në mënyrë të jashtligjshme.
Nga Drejtoria për të ardhura publike (DAP), vetëm nga muaji janar e deri në muajin prill, janë bërë 34 kontrolle në lojërat e fatit, ndërsa në 22 prej tyre është konstatuar se ata punojnë pa dokumentacione të rregullta, edhe atë në Tetovë, Gostivar, Bogovinë, Vrapçisht, Brveniocë, Radovish, Likovë, Mavrovë-Rostushe dhe Shtip.
Periudha e tranzicionit në Maqedoni kishte krijuar një masë të gjerë të popullatës e cila ishte e pasigurt në çështjet sociale dhe ekonomike, e përjashtuar nga rrjedhat shoqërore si dhe kishte krijuar një masë të shtresave të rrezikuara sociale dhe përqindje të lartë të papunësisë. /Telegrafi/
