Bota është tronditur nga deklaratat e fundit të kongresmenit republikan të Floridës, Randy Fine, i cili përmes postimeve në mediat sociale ka shfaqur një nivel të jashtëzakonshëm fanatizmi, të rrallë për institucionet demokratike.
Fine, amerikan me origjinë hebreje, deklaroi pa mëdyshje se “zgjedh qentë në vend të njerëzve myslimanë”, duke bërë edhe më parë thirrje të hapura për “shkatërrimin” e myslimanëve. Kjo retorikë dehumanizuese nuk është thjesht një fyerje për besimtarët, por një sulm direkt ndaj qenies njerëzore.
Si mundet Amerika, vendi që pretendon të jetë fener i lirive dhe të drejtave universale, të tolerojë brenda legjislativit të saj individë që përdorin një gjuhë që kujton periudhat më të errëta të historisë? Kur një përfaqësues i pushtetit barazon një të katërtën e popullsisë së botës me kafshët, ai nuk po bën politikë – po instalon një formë të rrezikshme të neo-nazizmit modern në zemër të SHBA-së.
Të trajtosh mbi dy miliardë njerëz si një turmë pa të drejta, pa pafajësi dhe pa dinjitet, është manifesti i një urrejtjeje që nuk njeh kufij. Ky qëndrim është i papranueshëm dhe tejet kritik.
Nuk mund të ketë ekuilibër diplomatik apo liri shprehjeje kur një zyrtar i lartë fyen hapur një besim të tërë, duke i zhveshur njerëzit nga cilësia e tyre njerëzore. Kjo gjuhë është pikërisht baza mbi të cilën janë ngritur gjenocidet dhe masakrat më të tmerrshme në histori.
Heshtja e administratës Trump dhe e kolegëve të tij përballë kësaj islamofobie të egër është një bashkëfajësi që njollos moralin e Amerikës në syrin e botës. Si mund të flasë një superfuqi për vlera, kur lejon që zyrtarët e saj më të lartë të shpërndajnë një lumë urrejtjeje?
Amerika duhet të spastrojë radhët e saj nga këta elementë që njollosin flamurin e saj me ngjyrat e racizmit dhe dehumanizimit. Nëse ky neo-nazizëm i veshur me kostum zyrtar tolerohet, faji nuk mbetet vetëm te Randy Fine, por te një sistem që po humbet busullën morale dhe po bëhet strehë për ideologji që njerëzimi mendonte se i kishte mposhtur dekada më parë.
