Qendra Kombëtare për Menaxhim Kufitar ka njoftuar për një kufizim të përkohshëm në qarkullim në aksin rrugor Pejë–Rozhajë, i cili do të prekë vetëm automjetet e rënda.
Sipas njoftimit zyrtar, nga data 14 prill 2026, ora 10:00, deri më 17 prill 2026, ora 10:00, kjo rrugë do të jetë e bllokuar për qarkullimin e kamionëve.
Vendimi është marrë pas komunikimit me autoritetet përkatëse në Mal të Zi, konkretisht me Policinë malazeze, dhe lidhet me situatën në territorin e këtij shteti, në zonën e Dacajt, ku do të zbatohet kufizimi.
Sipas sqarimit, bllokimi ka të bëjë me kufizimet që zbatohen për shoferët e kamionëve në Bashkimin Evropian, si dhe me disa kërkesa të brendshme të tyre, që kanë ndikuar në këtë vendim të përkohshëm.
Autoritetet bëjnë të ditur se masa nuk do të ndikojë në qarkullimin e automjeteve të vogla, të cilat do të vazhdojnë të lëvizin normalisht në këtë segment rrugor gjatë gjithë periudhës së bllokimit.
Drejtuesit e mjeteve të rënda këshillohen të planifikojnë paraprakisht itineraret e tyre dhe të përdorin rrugë alternative deri në përfundimin e kësaj mase.
