Avokati Besnik Berisha, në një prononcim për Telegrafin ka thënë se pompoziteti i cili e ka shoqëruar procesin e arrestimit të të dyshuarëve për pjesëmarrje në luftën e Sirisë dhe Irakut, mund ta dëmtojë imazhin e Kosovës në arenën ndërkombëtare!
Berisha ka theksuar se askush nuk duhet të penalizohet, ndiqet ose paraburgoset si rezultat i shkuarjes së tij në Siri. Sepse, sipas tij, shkuarja e një personi në një vend ku ka konflikt ose luftë nuk paraqitet vepër penale në asnjë kod të shteteve moderne dhe sigurisht as të shtetit të Kosovës.
“Shkuarja në një vend për t’iu bashkangjitur formacioneve paramilitare ose ushtarake nuk është e sanksionuar me ligjin tonë, përveçse nëse ato organizata, formacione ose grupe të armatosura janë në listën e Organizatës së Kombeve të Bashkuara (OKB) si organizata terroriste. Të gjithë ata persona që evidentohen dhe faktohen që janë anëtarë të këtyre grupeve të njohura si grupe terroriste, sigurisht se mund të ndiqen penalisht në kuadër të dispozitave të kodit penal të Kosovës”, thotë ai.
Për Berishën, nëse disa qytetarë të Kosovës kane shkuar në luftën e cila po zhvillohet në Siri, me qëllimin e vetëm që ta mposhtin regjimin e Bashar al Assadit dhe ta ndihmojnë popullin sirianë në largimin e tiranisë, ata njerëz nuk duhet të ndëshkohen.
Avokati thekson se nga ajo që është dëgjuar në seancën dëgjimore, vetëm katër ose pesë nga të ndaluarit kanë pranuar që kanë shkuar në Siri, por se qëllimi i shkuarjes së tyre në Siri ka qenë “mbështetja e popullit sirian për ta mposhtur regjimin e Assadit”.
“Me të kuptuar që ajo luftë ishte më ndryshe nga ajo për të cilën këta kishin shkuar, ata vullnetarisht kanë kërkuar që të ktheheshin në vendin e tyre. Madje, një nga ta ka deklaruar se nuk i është bashkuar asnjë formacioni luftarak, duke qëndruar kështu në një kamp dhe duke pritur që të kthehen sa më parë në Kosovë. ai nuk ka dashur që të bëhet pjesë e luftimeve ndërmjet grupeve dhe fiseve të ndryshme”, thekson ai.
Për të, secili gjykatës duhet ta ketë parasysh se “një formë përkrahje për shkuarjen në Siri kanë qene edhe deklaratat e ministrit të Punëve të Jashtme të Kosovës, Enver Hoxhaj, pastaj thirrjet dhe sensibilizimi i shteteve evropiane dhe botërore, në veçanti Shteteve të Bashkuara të Amerikës (SHBA), e cila pikërisht një vit me herët, në periudhat kur mendohet që kane shkuar të ndaluarit në Siri, e kanë shqyrtuar mundësinë e ndërhyrjes në Siri për shkak të tronditjes që e kishin pësuar nga masakrat që janë bërë ndaj popullit sirianë, deri te përdorimi i armëve të shkatërrimit në masë”.
“Nëse mund të përdoret termi nxitje, të dyshuarit për vepra terroriste janë nxitur nga këto skena (maskara) dhe nga ato thirrje të cilat janë bërë për mbështetje të revolucionit sirian. Madje, zyrtarë të shtetit tonë i kanë takuar liderët e opozitës siriane, të cilët kanë premtuar aso kohe se nëse ata e fitojnë luftën, do ta njohin pavarësinë e Republikës së Kosovës”, ka thënë Berisha.
Ai ka theksuar se meqë disa prej tyre ishin edhe ish pjesëtarë të Ushtrisë Çlirimtare të Kosovës dhe Ushtrisë Çlirimtare Kombëtare në Maqedoni, me vullnetin e mirë shkuan për të luftuar në Siri, duke shtuar se “ajo që do të duhej ta gëzonte secilin qytetar të republikës së Kosovës është se asnjëri nga ata nuk kishte mentalitet terroristi”.
“Asnjëri nga ata nuk kishte shkuar në Siri për të kryer masakra mbi fëmijët dhe njerëzit e pafajshëm. Madje, as për të luftuar për interesa të fiseve, klaneve ose grupeve të ndryshme. Por, kishte shkuar për t’iu përgjigjur thirrjes për ndihmë ndaj popullit sirianë”, thotë Berisha.
Sipas tij, e mira e gjithë kësaj është se ata janë kthyer vullnetarisht në Kosovë dhe se pothuajse të gjithë të dyshuarit për terrorizëm janë persona të punësuar, kanë familje dhe kujdesen për to.
“Madje një pjesë e madhe nga ta ishin njerëz të ngritur në nivelin akademik, me gradën master e kandidatë për doktoratë. Ajo çka u dëshmua fuqishëm është se ata njerëz nuk i reflektojnë ato që i shohim ne çdo dit në media – veprimet e ISIS-it dhe personazhit kryesor të ditëve të fundit, Lavdrim Muhaxherit”, deklaron avokati mbrojtës.
Sipas tij, përshëndetjet e menjëhershme të arrestimeve nga institucionet – filluar nga Presidenca, pastaj “krekosja e kryeministrit që ai i kishte autorizuar këto veprime” dhe se nuk ishin si rezultat i punës operative hetimore të Prokurorisë dhe Policisë – i kanë bërë më tepër Kosovës, sesa organizatave terroriste që veprojnë në Siri.
“Komentet dhe presioni i fuqishëm, p.sh nëse vjen nga presidentja për këtë akt, për një gjyqtar të procedurës paraprake përbën lajm i cili e bën atë të kujtohet tri herë se nga të vendos. Presioni e rrezikon edhe punën e prokurorit, ne qoftë se ai nuk kryen veprime tjera për ta vërtetuar atë e cila pretendohet”, ka thënë Berisha.
Sipas tij, ajo çka është e njohur është se Kosova tashmë është dëmtuar në syrin e faktorit ndërkombëtar, më tepër si pasojë e veprimeve të marra nga institucionet e shtetit se sa nga veprimet e atyre njerëzve që po dyshohen për terrorizëm.
“Në qoftë se ne pretendojmë që i kemi kapur 40 terroristë, me mburrje tashmë të vërtetuar qe ishin anëtarë të grupeve kriminale terroriste në botë, i bie de fakto që Kosova është një vend që shërben si çerdhe e terrorizmit në botë”, ka thënë Berisha.
