Akademia e Shkencave dhe Arteve të Kosovës (ASHAK) ka shënuar sot 50-vjetorin e themelimit me një ceremoni solemne në Prishtinë, që mblodhi figura të larta shtetërore nga Kosova dhe Shqipëria, përfaqësues të akademive të vendeve të ndryshme dhe ambasadorë të akredituar. Ngjarja u vlerësua si një moment historik që përmbyll gjysmëshekullin e punës së institucionit më të lartë shkencor e kulturor të vendit, i cili ka qenë i pandashëm nga zhvillimet politike dhe shoqërore të Kosovës.
Në fjalën e tij përshëndetëse, kryetari i ASHAK-ut, Mehmet Kraja, theksoi se historia e Akademisë është e ndërthurur ngushtë me historinë e Kosovës. Ai kujtoi se ASHAK-u, që nga themelimi, ka vepruar si institucion i Kosovës dhe ka mbetur i tillë në të gjitha fazat e zhvillimit të saj, duke reflektuar sfidat, aspiratat dhe tranzicionet që ka kaluar vendi.
“Akademia u themelua si e Kosovës dhe si e tillë ka mbijetuar deri sot, duke ndarë fatin e vështirë të historisë dhe gjeografisë së vendit. Në këtë rrugëtim, ajo ka kontribuar në emancipimin shoqëror, duke u lidhur ngushtë me vlerat e humanizmit, mendimit të lirë dhe progresit”, u shpreh Kraja, duke nënvizuar rrethanat specifike politike dhe shoqërore që paraprinë krijimin e institucionit.
Kraja theksoi se, pavarësisht arritjeve të rëndësishme, sfida kryesore e Akademisë mbetet konsolidimi i plotë institucional dhe sigurimi i pavarësisë së saj funksionale. Ai rikujtoi se ASHAK-u ka qenë jo vetëm mbështetëse e të gjitha proceseve politike që çuan Kosovën drejt pavarësisë, por shpesh edhe gjeneruese idesh që ndikuan në orientimin kulturor dhe shoqëror të vendit.
Presidentja e Kosovës, Vjosa Osmani, në fjalën e saj vlerësoi ASHAK-un si qendrën ku u formësua mendimi politik dhe akademik i vendit. Ajo tha se akademikët, përgjatë pesë dekadave, kanë punuar në rrethana të vështira, por me qëllimin e palëkundur për të mbrojtur gjuhën, kulturën dhe interesin kombëtar.
“Akademikët kanë artikuluar idetë që i dhanë kuptim rrugës sonë për një shoqëri të vlerave dhe për një shtet modern, të integruar në institucionet euroatlantike. Studimet, arkivat, botimet dhe krijimtaria letrare-artistike kanë mbajtur gjallë ëndrrën tonë për liri dhe shtet”, deklaroi Osmani.
Ceremonia jubiliare u vlerësua si një pikë reflektimi për rrugën e deritanishme dhe si një udhërrëfyes për misionin e ardhshëm të ASHAK-ut në forcimin e dijes, kulturës dhe identitetit të Kosovës në arenën evropiane dhe ndërkombëtare.
