Trend i rritjes së sëmundjes epileptike

Në Kosovë rreth 20 mijë persona vuajnë nga epilepsia, thonë profesionistë shëndetësorë, derisa në botë vlerësohet se janë rreth 50 milionë njerëz me këtë sëmundje. 
 
Valbona Govori, neuropsikiatre, i ka thënë Radios Evropa e Lirë se kjo sëmundje paraqitet kryesisht te fëmijëria e hershme, derisa na flet edhe për trajtimin e kësaj sëmundjeje.
 
“Me sëmundjen e epilepsisë, përpos Qendrës Klinike Universitare të Kosovës, përkatësisht Klinikës së neurologjisë, merren edhe qendrat tjera të mjekësisë familjare. Epilepsia paraqitet në çdo kohë, shfaqja në moshën e fëmijërisë është më e shpeshta”, ka thënë Govori.
 
Zyrtarë në Ministrinë e Shëndetësisë kanë deklaruar se trendi i sëmundjes së epilepsisë është në rritje.
 
Gani Halilaj, neuropsikiatër, njëherësh shef i divizionit të shëndetit mendor në Ministrinë e Shëndetësisë, jep hollësi të tjera:

“Epilepsia, është një sëmundje mjaft e shprehur. Sa i përket çështjes së furnizimit, Ministria e Shëndetësisë ka bërë furnizim stabil, sidomos me barnat anti-epileptike, ku kemi disa lloje me të cilat furnizohet QKUK – ja, e që janë të nevojshme për trajtimin e kësaj sëmundje. Është e vërtetë që është një rritje e trendi i sëmundjes së epilepsisë, e që është ndërlidhshmëri e shumë faktorëve, por lidhet edhe me problemet që janë të shprehura në popullatën e Kosovës, sidomos pas luftës”.
 
Ndërkaq, Govori flet edhe për kushtet, në të cilat trajtohen pacientët me epilepsi, në Klinikën neuropsikiatrike në Qendrën Klinikë Universitare.
 
“Kushtet në Klinikën e neurologjisë janë relativisht të mira, por ne e dimë që mjekësia ka metoda çdo ditë e më të sofistikuara. Mendoj se kemi rezultate të mira gjatë trajtimit të këtyre pacientëve. Sa i përket barnave, qëndrojmë mirë, por ka mungesa të kohëpaskohshme”, ka thënë Govori.
 
Shoqata kundër Epilepsisë e Kosovës nga viti 2011 është anëtare e Ligës Internacionale Evropiane kundër epilepsisë.