Lëvizja Vetëvendosje e udhëhequr nga Albin Kurti ka shënuar një fitore bindëse në zgjedhjet e jashtëzakonshme parlamentare në Kosovë, duke marrë afro 50% të votave dhe duke u pozicionuar qartë si forca kryesore politike në vend. Me këtë rezultat, Kurtit i jepet sërish mundësia për formimin e qeverisë, një objektiv që për muaj nuk ishte realizuar për shkak të ngërçit institucional, që përfundimisht çoi në zgjedhje të reja.
Në mbrëmjen e fitores, sheshi u mbush me mbështetës të LVV-së, ku Kurti falënderoi qytetarët për besimin dhe energjinë e dhënë. Ai u shpreh se koalicioni me Guxo, Alternativa dhe PShDK përbën një subjekt politik të qëndrueshëm, në të cilin qytetarët mund të mbështeten. “Ju faleminderit që sonte, dhe jo vetëm sonte, na e bëni dimrin verë e politikën pranverë. Të gjitha premtimet tona do t’i përmbushim. Na qëndroni pranë që t’ju qëndrojmë edhe më pranë, dhe Kosova të ecë përpara në ekonomi, arsim, kulturë, siguri dhe qëndrueshmëri”, tha Kurti mes duartrokitjeve.
Më herët, në një dalje publike për media, ai e cilësoi rezultatin si “më të thellin në historinë e vendit”, duke theksuar se “fitoi populli i Kosovës dhe Republika”. Sipas tij, certifikimi i shpejtë i votave është i domosdoshëm për të nisur punën e re qeverisë.
Sipas rezultateve preliminare të KQZ-së, me mbi 95% të votave të numëruara, Vetëvendosje renditet e para me rreth 49.8%. PDK pozicionohet e dyta me mbi 21%, ndërsa LDK e treta me rreth 13.8%. AAK përfitoi rreth 6% të votave, ndërsa Lista Serbe rreth 3.5%. Në Kuvend, përveç forcave shqiptare, do të përfaqësohen edhe partitë e minoriteteve, me 20 ulëse të rezervuara – 10 për serbët dhe 10 për komunitetet tjera.
Zgjedhjet u zhvilluan më 28 dhjetor, ku pjesëmarrja arriti rreth 44%, pak më e lartë krahasuar me zgjedhjet e mëparshme. Procesi u vlerësua i qetë dhe i rregullt nga KQZ, ndërsa mbi 8600 vëzhgues monitoruan garën zgjedhore. Në total konkuruan 22 subjekte politike me 1180 kandidatë për 120 vende në Kuvend.
Fitore e tretë politike e Albin Kurtit shënon një kapitull të ri për Kosovën, e cila tani hyn në një fazë të re pritshmërish dhe sfidash qeverisëse.
