Valë e re arrestimesh për korrupsion pritet pas 8 qershorit

Vala e arrestimeve për krim të organizuar dhe korrupsionin do të vazhdoj menjëherë pas zgjedhjeve të parakohshme parlamentare të 8 qershorit.
Burime të Indeksoline kanë bërë të ditur se tashmë një listë prej më shumë se 40 rasteve është gati për t’u zbatuar, mirëpo për shkak të zgjedhjeve, arrestimit i personave që ndërlidhen me këto raste pritet të nis pas 10 qershorit.
“Në këtë listë janë përfshirë zyrtarë të lartë që akuzohen për korrupsion dhe krim të organizuar, mirëpo ende nuk mund të flitet për emra konkret”, ka thënë një burim i Indeksonline, duke shtuar se personave të arrestuar do t’iu konfiskohet edhe pasuria.
“Në këto raste të krimit të organizuar dhe korrupsionit janë të përfshirë persona që vijnë nga të gjitha partitë”, ka thënë tutje burimi.
Më 30 prill Policia e Kosovës pati arrestuar dhjetëra zyrtarë të Agjencisë Kosovare të Privatizimit nën dyshimin se kanë kryer keqpërdorime gjatë privatizimit të fabrikës së armaturës në Podujeve apo siç njihet fabrika FAN.
Në mesin e të arrestuarve ishte edhe ish deputeti i LDK-së në Kuvendin e Kosovës, Naser Osmani i cili në kohën e privatizimit të fabrikës ishte anëtar i Bordit të Drejtorëve të AKP-së.
Po ashtu Policia pati arrestuar edhe persona tjerë të dyshuar për falsifikim të diplomave që ndërlidheshin me zyrtarin e AKI-së, Isuf Lumi.