Imam Jamil Al-Amin, i njohur më herët si H. Rap Brown, ishte një nga figurat kryesore të lëvizjes për të drejtat civile në SHBA dhe më vonë një udhëheqës i respektuar musliman. I lindur në Baton Rouge në vitin 1943, ai u aktivizua herët në çështjet e drejtësisë shoqërore. Në vitin 1967 u zgjodh Kryetar i Komitetit Studentor Jo të Dhunshëm (SNCC), duke pasuar Stokely Carmichael dhe duke e orientuar organizatën drejt mbrojtjes së të drejtave të njeriut. Pikërisht në këtë periudhë ai u vu nën shënjestër nga programi COINTELPRO i FBI-së, i cili synonte shkatërrimin e lëvizjeve afro-amerikane për çlirim.
Në vitin 1976, pas kryerjes së haxhit në Arabinë Saudite, ai u rikthye në Atlanta dhe nisi organizimin e një komuniteti musliman aktiv në lagjen West End. Gjatë më shumë se dy dekadave ai punoi për pastrimin e lagjeve nga droga dhe kriminaliteti, për ndërmjetësimin e konflikteve mes të rinjve, si dhe për bashkimin e rreth 40 xhamive në organizatën “Al Ummah”. Kontributi i tij në programet e paqes dhe në uljen e dhunës mes grupeve të rrugës ndikoi në rënie të krimit dhe reduktim të vrasjeve brenda komuniteteve të margjinalizuara.
Në mars 2000 ndodhi një të shtënë pranë dyqanit të tij në Atlanta, dhe më 20 mars ai u arrestua në Alabama. Gjatë arrestimit u rrah dhe u pështy nga një agjent i FBI-së. Procesi gjyqësor që pasoi në vitin 2002 zgjati vetëm tre javë dhe u kritikua gjerësisht për mospërputhje në prova. Megjithë dëshmitë mbështetëse të shumë personaliteteve civile dhe fetare, ai u shpall fajtor dhe u dënua me burgim të përjetshëm pa të drejtë lirimi.
Pas gjashtë vitesh burg në Georgia, ai u transferua në mënyrë të beftë në burgun federal Supermax në Colorado dhe më vonë në Tucson, duke u mbajtur larg familjes dhe ekipit ligjor. Edhe pse i izoluar, ai mbeti i palëkundur në bindjet dhe karakterin e tij.
Imam Jamil Al-Amin ndërroi jetë sot, në moshë të shtyrë, në një nga burgjet federale, pas dekadash të tëra të mbajtjes në izolim.
Allah e mëshiroftë dhe e shpërbleftë ndër të drejtët. Amin.
