Një gjykatë ushtarake tuniziane ka urdhëruar lirimin e ish- ministrave të diktatorit të rrëzuar Ben Ali. Nga lirimi do të përfitojnë ish ministri i brendshëm, si dhe shefi i sigurisë, të cilët ishin burgosur pas revolucionit të vitit 2011.
Shefi i sigurisë Ali Seriati dhe ish- ministri i brendshëm Rafik Bel Haj Kalem, që të dy janë akuzuar për shtypjen e protestuesve gjatë kryengritjes. Lirimi i tyre mund të ndezë tensionet në Tunizi, pikërisht tani kur vendi është në fazat e fundit të tranzicionit demokratik.
Tunizia ka kapërcyer paqëndrueshmërinë politike duke miratuar një kushtetutë të re dhe pas instalimit të qeverie konsensuale e cila merret me udhëheqjen e vendit deri në zgjedhjet që mbahen këtë vit.
Por ashtu si në vendet e tjera të “Pranverës Arabe”, ende vazhdon debati mbi rolin e ish-zyrtarëve të regjimit.
“Ata do të lirohen në ditët e ardhshme. Kjo është një goditje për tranzicionin pas revolucionit,” tha Laila Haddad, një avokate e familjeve të viktimave që u vranë në përleshjet gjatë “Revolucionit Jasminë”, të vitit 2011.
Vendimi gjyqësor është konfirmuar nga Nizar Ayad, avokat i ish -ministrit të Brendshëm.
Më shumë se 300 vetë u vranë në përleshjet gjatë protestave që janë shkaktuar nga ankesat ekonomike dhe korrupsioni, por që shpejt u shndërruan në një kryengritje kundër regjimit. Këto protesta detyruan diktatorin Ben Ali të largohej për në Arabinë Saudite.
Tranzicioni i Tunizisë është parë si një model i kompromisit dhe procesit demokratik për rajon.
Pjesë e këtij kompromisi ishte pranimi i disa zyrtarëve të Ben Ali në politikë, ndryshe nga Libia dhe Egjipti, ku ish- figurat e regjimit u larguan në ditët e para pas revolucioneve. /mesazhi/