Në Gaza, klubi sportiv Mashtel – i cili u shkatërrua rëndë dhe u dogj gjatë dy viteve të genocidit izraelit – ka rifilluar aktivitetin, pavarësisht kushteve të vështira dhe mungesës së pajisjeve. Qëllimi i tij është të ndihmojë fëmijët palestinezë të kapërcejnë traumat e luftës dhe të rigjejnë ndjenjën e forcës dhe vetëbesimit.
Sulmet izraelite pas 7 tetorit 2023 shkatërruan një pjesë të madhe të jetës civile në Gaza, duke përfshirë infrastrukturën sportive. Sipas të dhënave lokale, 894 sportistë palestinezë janë vrarë dhe 292 impiante sportive janë shkatërruar ose dëmtuar rëndë.
Dëmet fizike u shoqëruan me pasoja të thella psikologjike për popullin palestinez. Traumat e dy viteve të luftimeve kanë shkaktuar, sipas ekspertëve, “mpirje emocionale” dhe humbje të ndjenjës së sigurisë tek fëmijët.
Pikërisht në këtë kontekst, trajnerët e Mashtel-it kanë nisur programin “Po, ne mundemi”, përmes të cilit synojnë të ringjallin klubin dhe të krijojnë hapësira të sigurta për fëmijët. Ata lyen muret e djegura, pastruan rrënojat dhe siguruan pajisjet minimale për rifillimin e stërvitjeve.
“Prioriteti ynë janë vajzat dhe djemtë që jetojnë në çadra,” thotë Hasan al-Rai, drejtori i Akademisë së klubit. “Sportet e vetëmbrojtjes i ndihmojnë fëmijët të rikthejnë vetëbesimin dhe të përmirësojnë shëndetin e tyre mendor.”
Programi ka përfshirë rreth 200 fëmijë, të cilëve u ofrohen kurse falas. Trajnerët thonë se artet marciale u japin fëmijëve ndjenjën se mund të mbrojnë veten dhe t’i bëjnë ballë sfidave të jetës në kampet e zhvendosjes.
Marwa al-Halabi, një prej anëtareve të klubit që tani asiston në trajnime, tregon se për dy vjet nuk kanë pasur mundësi të ushtrojnë. “Klubi ishte plot jetë para luftës. Tani është i djegur, pa pajisje, por ne po përpiqemi të vazhdojmë me ato që kemi.”
Ndërsa Hanin Fura, 15 vjeçe, e cila jeton në një kamp me çadra, thotë se është bashkuar me trajnimin për të ndier më shumë siguri: “Dua të di të mbrohem nëse ndodh diçka.”
