Nuk ishte thjesht një fjalim, ishte një britmë për njerëzimin. Pep Guardiola, një nga gjenitë më të mëdhenj të futbollit, zhveshi petkun e trajnerit për të zbuluar shpirtin e një njeriu të lënduar nga padrejtësia. Mbrëmë, në skenën e Palau Sant Jordi në Barcelonë, ai u bë zëri i atyre që nuk kanë zë.
Me një shall palestinez (kefije) të mbështjellë rreth qafës – simbol i rezistencës dhe dhimbjes – Guardiola mori skenën në koncertin bamirës “Act x Palestina”. Qëllimi ishte i qartë: të mblidheshin fonde dhe të ndizej ndërgjegjja e fjetur e botës për tragjedinë humanitare në Gaza.
“Ku është nëna ime?” – Ankthi i Braktisjes
Fjalët e tij nuk ishin politike, ato ishin thellësisht njerëzore dhe shpuese. Me një ton të rënduar nga dhimbja, ai përshkroi tmerrin e fëmijëve palestinezë, të cilët, mes rrënojave dhe pluhurit të luftës, kërkojnë prindërit e tyre të vrarë.
“Mirëmbrëma, selam alejkum, paqja qoftë mbi ju. Mendoj atë që mendojmë të gjithë kur e shohim një fëmijë në këto dy vjet, kur e shohim me këto fotografi në rrjetet sociale, në televizion, duke u filmuar, duke u lutur ‘ku është nëna ime?’ midis rrënojave, dhe ai ende nuk e di.”
Salla ra në heshtje kur Guardiola preku plagën më të madhe të kësaj tragjedie: ndjenjën e braktisjes totale nga bota.
“Dhe unë gjithmonë mendoj: pse duhet të mendojnë ata? Dhe mendoj se i lamë të hestur, të braktisur.”
Një akuzë e fortë ndaj “frikacakëve” të botës
Nga dhimbja, fjalimi i tij kaloi në një zemërim të drejtë. Guardiola nuk ngurroi të drejtonte gishtin drejt fuqive të mëdha botërore, duke i zhveshur ata nga çdo justifikim moral. Ai foli për kontrastin e tmerrshëm midis komoditetit të liderëve dhe realitetit të përgjakshëm të të pafajshmëve.
“Të fuqishmit janë frikacakë sepse dërgojnë njerëz për të vrarë njerëz të pafajshëm. Ndërsa ata janë në shtëpi me ngrohje kur është ftohtë dhe ajër të kondicionuar kur është vapë.”
Ky denoncim i ashpër u pasua nga një ovacion i jashtëzakonshëm. Publiku u ngrit në këmbë, duke duartrokitur për minuta të tëra, jo për trajnerin e trofeve, por për njeriun që guxoi të thoshte të vërtetën.
“E gjithë kjo ka të bëjë thjesht me njerëzimin. E cila është e gjitha që po ndodh në Palestinë,” përmbylli ai.
Një histori guximi
Kjo nuk është hera e parë që Guardiola zgjedh anën e të shtypurve, pavarësisht kostove. Ai ka një histori të gjatë të shprehjes publike të pikëpamjeve të tij, duke sfiduar shpesh autoritetet sportive.
-
Në vitin 2018, ai u gjobit me 20,000 euro nga Federata Angleze (FA) vetëm sepse mbante një shirit të verdhë në krah, në shenjë solidariteti me liderët e burgosur katalanas pro-pavarësisë.
-
Sot, ai qëndron krah popullit palestinez, duke denoncuar terrorin dhe duke mbrojtur të drejtën për jetë.
Koncerti “Act x Palestina” bëri bashkë më shumë se 30 artistë për të mbështetur një popull në nevojë, por ishte Guardiola ai që, me thjeshtësinë dhe guximin e tij, i dha mbrëmjes peshën e vërtetë emocionale, duke na kujtuar se para se të jemi spektatorë, jemi njerëz.
