Pjesë nga Pesë Shtyllat e Prosperitetit (Botim i Shkurtuar) nga M. Yaqub Mirza – Kapitulli: Shtylla e Pestë.
Dhënia është thelbi i të jetuarit. Ajo prek gjithçka që bëjmë që është vërtet domethënëse. Unë besoj se të gjithë jemi këtu për të bërë një ndryshim – përndryshe cili është qëllimi i jetesës? Ndërsa jetojmë dhe përjetojmë botën gjatë kohës sonë këtu, kontributet tona shpresojmë ta lënë botën një vend më të mirë. Ne gjithashtu japim për të ofruar drejtësi ndër-gjeneracionale; domethënë, nëse ne po ecim mirë, atëherë le të bëjmë diçka që brezi i ardhshëm të ketë të njëjtat mundësi.
Gjeni të gjitha temat e këtij libri brenda këtij linku më poshtë:
https://dijaonline.com/tag/pese-shtyllat-e-prosperitetit/
Dhënia nuk ka për qëllim të inkurajojë varësinë te marrësi ose të krijojë një nënklasë të përhershme. Shumica prej nesh mbështesin parimin: është më mirë t’i mësosh një njeriu si të peshkojë sesa t’i japësh një peshk. Megjithatë, duke u shërbyer atyre që janë vërtet në nevojë, ne po i shërbejmë vetë Zotit. Kjo thuhet në shumë raste në Kuran si dhe në Biblën Hebreje dhe Dhiatën e Re të Krishterë:
Dhe mos harroni të bëni mirë dhe të ndani me ata që janë në nevojë. Këto janë flijimet që i pëlqejnë Perëndisë. (Hebrenjve 13:16)
Dhe shpenzoni nga pasuria juaj në rrugën e All-llut, dhe mos e hidhni veten tuaj në rrezik (duke mos shpenzuar), por bëni mirë; se All-llahu i do bëmirësit. (K 2:195)
Ata që shpenzojnë pasurinë e vet natën e ditën, fshehurazi e haptazi, ata shpërblimin e vet e kanë te Zoti i tyre, për ata nuk ka frikë, as nuk kanë përse të mërziten. (K 2:274)
Sepse pata uri dhe më dhatë për të ngrënë, pata etje dhe më dhatë për të pirë, isha i huaj dhe më pritët, isha i zhveshur dhe më veshët, isha i sëmurë dhe më vizituat, isha në burg dhe erdhët tek unë. (Mateu 25:35–36)
Ju do të pasuroheni në çdo mënyrë që të mund të jeni bujarë në çdo rast. (2 Korintasve 9:11)
Do ta hapësh dorën tënde ndaj vëllait tënd, ndaj të varfrit dhe nevojtarit në tokën tënde. (Ligji i Përtërirë 15:11)
Një person që nuk mund të japë para duhet të japë çfarëdo që ka në dispozicion për të dhënë, siç ilustrohet në dy tregimet e mëposhtme:
Profeti Muhamed tha: “Çdo musliman duhet të japë lëmoshë.” Njerëzit atëherë pyetën: “[Por çfarë] nëse dikush nuk ka asgjë për të dhënë, çfarë duhet të bëjë?” Profeti u përgjigj: “Ai duhet të punojë me duart e tij dhe të përfitojë vetë dhe gjithashtu të japë lëmoshë [nga ajo që fiton].” Njerëzit pyetën më tej: “Nëse ai nuk mund ta bëjë [as] këtë?” Profeti tha përfundimisht: “Atëherë ai duhet të kryejë vepra të mira dhe të qëndrojë larg veprave të këqija, dhe kjo do të konsiderohet si vepër bamirësie.”
Në Islam, dhënia ndahet në dy kategori: dhënia e detyrueshme, e quajtur zekat, dhe dhënia vullnetare, e njohur si sadaka.
Kuptimi i zekatit
Për ata që kanë para për të dhënë, ligji islam kërkon që ata t’i japin ato çdo vit si zekat (bamirësi, ose taksë pasurie). Zekati konsiderohet aq i rëndësishëm sa është e treta nga pesë shtyllat e besimit islam.
Përmbushja e kësaj shtylle kërkon që muslimanët të shtrijnë dorën drejt komunitetit dhe të ndërveprojnë me të tjerët në një mënyrë domethënëse dhe të thellë.
Zekati është i ngjashëm me të dhjetën në traditat hebraike dhe të krishtera. Bibla Hebraike thotë se duhet të jepet e dhjeta e asaj që fitohet.
Llogaritja e zekatit
Zekati është i detyrueshëm për të ardhurat bruto të vitit aktual para taksave – zekati, e drejta e Allahut, llogaritet para të drejtave të njeriut (taksave).
Zekati është gjithashtu i detyrueshëm për kursimet dhe investimet që pronari i tyre i ka mbajtur për një vit hënor, të gjitha mallrat në tregti mbi nisabin, dhe pasuritë e paluajtshme dhe mallrat kapitale nëse ato zotërohen (nuk mbahen me kredi) dhe stokohen për tregti (jo prodhim).
Dhënia ndërsa jeni gjallë
Unë argumentoj fuqimisht për dhënien ndërsa jeni gjallë. Pse? Dhënia ndërsa jeni gjallë ju ofron mundësinë për të parë efektet e dhuratës suaj. Ndërsa jeni gjallë, mund të drejtoni ose ridrejtoni përdorimin e kontributeve tuaja.
Ebu Said el-Khudri raportoi se i Dërguari i Zotit ka thënë: “Është më mirë që një burrë të japë një dërhem si sadaka (bamirësi) gjatë jetës së tij, sesa të japë njëqind në kohën e vdekjes së tij.”
STRATEGJITË KRYESORE TË NDËRTIMIT DHE RUAJTJES SË PASURISË
Rritja e Aseteve Tuaja
Kur doni të ndërtoni një pasuri të konsiderueshme, duhet të filloni herët. Në fakt, duhet të filloni sot. Sa më shpejt të investoni, aq më shpejt paratë tuaja mund të fillojnë të rriten.
Ekzistojnë dy mënyra të shkëlqyera për të investuar. Një mënyrë është të blini gjëra me vlerë, vlera e të cilave prisni të rritet me kalimin e kohës, si pasuri të paluajtshme, aksione, art ose koleksione (një investim rritës). Një mënyrë tjetër është të blini gjëra që prisni se do të ofrojnë të ardhura të rregullta, për shembull, në formën e qirave ose dividentëve.
Përfundim
Është shpresa ime që idetë në këtë libër, të aplikuara saktë, t’ju ndihmojnë të menaxhoni financat tuaja me mençuri. Ky udhëzues mbulon disa parime financiare dhe morale që mund t’ju ofrojnë përmbushje shpirtërore dhe sukses ekonomik. Kur fitoni, kurseni, investoni, shpenzoni dhe jepni bazuar në këshillat e përshkruara në këtë udhëzues, ju mund të jetoni pa borxhe, me asetet tuaja të mbrojtura dhe të taksuara drejt. Gjithashtu, nevojat e familjes suaj do të kujdesen si tani ashtu edhe në të ardhmen.
Idetë e përmbajtura në këtë udhëzues bazohen në përvojën time. Tani mund të përfitoni prej tyre, ose edhe t’i përmirësoni ato. Nëse e keni gjetur të dobishëm këtë udhëzues, ju lutem lutuni për mua dhe ashtu si unë, bëni një donacion për bamirësinë tuaj të preferuar.
Do të doja ta mbyllja me hadithin dhe ajetin vijues:
Profeti tha: “O Allah! Kërkoj strehim tek Ti nga brenga dhe pikëllimi, kërkoj strehim tek Ti nga dobësia dhe përtacia, kërkoj strehim tek Ti nga frikacakëria dhe koprracia, dhe kërkoj strehim tek Ti nga të qenit i zhytur rëndë në borxhe dhe nga të qenit i mposhtur nga njerëzit.”
Zoti ynë! Pranoje (këtë shërbim) prej nesh: vërtet Ti je Dëgjuesi, i Gjithëdijshmi. (K 2:127)
Burimi: Pesë Shtyllat e Prosperitetit (Botim i Shkurtuar)
