Në gjykatën themelore në Ferizaj është shtyrë seanca e shqyrtimit fillestar ndaj të akuzuarit Festim Ramadanit, ish-polic, dhe të akuzuarit tjetër, Jeton Misini, të cilët dyshohen për vrasjen e 89-vjeçarit Sadri Sadriut në parkingun e një restoranti në fshatin Bibaj të Ferizajt, më 16 gusht të vitit të kaluar.
Të dy të akuzuarit u sollën nën pranga në gjykatë, ndërsa krahas avokatëve mbrojtës, në seancë ishin prezent edhe familjarët e Ramadanit dhe të ndjerit, raporton KP.
Pas fillimit të seancës, kryetari i trupit gjykues, Ilir Bytyqi, kërkoi nga prokurori Valdet Ademi që të lexohet aktakuza. Megjithatë, mbrojtja e të akuzuarve kërkoi shtyrjen e seancës, duke argumentuar se avokatët zëvendësues nuk kishin pasur komunikim të mjaftueshëm me klientët e tyre.
Avokati zëvendësues i Ramadanit, Naim Sahiti, deklaroi se përmes një shkrese të dorëzuar në gjykatë është kërkuar shtyrja e seancës, pasi nuk kanë pasur mundësi të marrin të gjitha shkresat e lëndës dhe të komunikojnë kohët e fundit me të mbrojturin. Ai shtoi se është në pamundësi të përfaqësojë plotësisht klientin pa këto dokumente.
Edhe avokati zëvendësues i Jeton Misinit, Driton Sejdiu, mbështeti këtë kërkesë, duke theksuar se po vepron vetëm si zëvendësues dhe nuk ka njohuri të plota për lëndën.
Gjyqtari Bytyqi njoftoi gjithashtu se mbrojtja e Ramadanit ka kërkuar për herë të dytë ekzaminim psikiatrik për të akuzuarin dhe transferimin e tij në Institutin e Psikiatrisë Forenzike të Kosovës, duke argumentuar se ish-polici kishte përdorur substanca psikotropike dhe kishte tentuar të vetëlëndohej.
Megjithatë, Festim Ramadani kundërshtoi kërkesën për shtyrje dhe ekzaminim psikiatrik, duke theksuar se dëshiron të deklarohet për fajësinë apo pafajësinë e tij dhe nuk e sheh të nevojshme ekzaminimin e mëtejshëm. Sipas tij, aktakuza është e qartë dhe përshkruan saktë rrethanat e ngjarjes, ndërsa çdo deklarim i tij në mungesë të njohurisë së materialit do të ishte sfidues për profesionin e gjykatës.
Në fund, gjykata vendosi të refuzojë kërkesën për ekzaminim psikiatrik, por aprovoi shtyrjen e shqyrtimit fillestar për një datë tjetër, duke argumentuar mungesën e njohurive të mbrojtjes për materialin e lëndës. Seanca e radhës është caktuar më 29 shtator nga ora 13:00.
Pala e dëmtuar kishte kërkuar që seanca të zhvillohej prapa dyerve të mbyllura për publikun, por gjykata nuk mori vendim për këtë dhe do ta rivlerësojë kërkesën në të ardhmen.
Ky rast kishte nisur me aktakuzën e ngritur më 18 korrik 2025 nga Departamenti i Krimeve të Rënda në Prokurorinë Themelore në Ferizaj, për shkak të dyshimit të bazuar për veprën penale “vrasja e rëndë”, lidhur me ngjarjen e 16 gushtit 2024 në Ferizaj.
