Kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati, gjatë një konference për media ka bërë të ditur se OVL e UÇK-së kërkon nga deputetët e Kosovës shkarkimin e Dimal Bashës nga pozita e kryetarit të Kuvendit të Kosovës.
Gucati theksoi gjithashtu se organizata kërkon nisjen e hetimeve nga Prokuroria e Shtetit, duke theksuar arsyet për këtë hap. “Arsyeja për fillimin e hetimeve është e qartë: pjesëmarrja në një luftë speciale propagandistike kundër UÇK-së dhe Republikës së Kosovës, si dhe lidhja personale dhe bashkëpunimi me persona të dyshimtë, përfshirë bashkëpunëtorë nga Maqedonia e Veriut, të cilët ndikojnë negativisht në zhvillimin dhe integritetin e vendit tonë”, tha Gucati.
OVL e UÇK-së kërkoi përgjegjësi të plotë dhe veprime të menjëhershme nga autoritetet për mbrojtjen e së vërtetës dhe nderit të luftës së UÇK-së. Sipas Gucatit, nëse këto kërkesa nuk merren parasysh, organizata do të ndjekë rrugë të tjera për veprim.
Ai shtoi se brenda LVV ekzistojnë dëshmitarë të cilët kanë dhënë informacione në Gjykatën Speciale. “Tu e marr prej Donika Gërvallës që ka dorëzuar dokumentacion në atë kohë dhe që vet e ka pranuar. Të tjerët do të dalin me emra, dhe më nuk do të fshehim asgjë nga askush, sepse nuk kemi frikë. Dimal Basha me kategoritë e dala nga lufta do të dalë humbës”, tha Gucati.
Hysni Gucati theksoi gjithashtu se Basha nuk mund t’i ikë përgjegjësisë vetëm me një deklaratë. Ai shtoi se kryetari i Kuvendit nuk ka dyert e hapura në këtë organizatë: “Njerëzit dhe soji i Bashës nuk i kanë dyert e hapura te ne; mund t’i kenë të hapura në Serbi, por jo në zyrat tona”, tha ai.
Ndërkohë, kryetari i ri i Kuvendit, Dimal Basha, ka reaguar pas publikimeve në media lidhur me një punim akademik të tij të vitit 2012. Në këtë punim, ku Basha ishte bashkëautor me profesoreshën Jana Arsovska në Kolegjin e Drejtësisë Penale “John Jay”, trajtohej bashkëpunimi i supozuar i UÇK-së me kriminelë brenda dhe jashtë Kosovës, përfshirë edhe çështje të lidhura me para dhe drogë.
Basha ka sqaruar se punimi është shkruar kur ai ishte student dhe ai mban përgjegjësi vetëm për kapitullin III, i cili trajton depërtimin e Islamit fundamentalist në Evropën Juglindore, me fokus Kosovën. Ai theksoi se autorësia e pjesës tjetër i përket vetëm autores, Jana Arsovska, e cila ka dërguar një email demantues, duke sqaruar se Basha ka dorëzuar për publikim vetëm kapitullin në fjalë.
