Një shpërthim i fuqishëm goditi Ambasadën e Shteteve të Bashkuara në Oslo herët të dielën, duke shkaktuar dëme të vogla materiale, por pa persona të lënduar, sipas autoriteteve norvegjeze.
Shpërthimi ndodhi rreth orës 01:00 në kompleksin diplomatik në pjesën perëndimore të qytetit, duke krijuar re të dendura tymi pranë hyrjes së seksionit konsullor, raportuan dëshmitarët.
Policia e Oslos bëri të ditur se është në kërkim të një ose më shumë personave të dyshuar, ndërsa ministrja e Drejtësisë e Norvegjisë, Astri Aas-Hansen, konfirmoi se ka nisur një hetim i plotë.
“Ky është një incident i papranueshëm që po e marrim shumë seriozisht”, deklaroi ajo për agjencinë norvegjeze të lajmeve NTB.
Sipas policisë, shpërthimi ndodhi në hyrje të seksionit konsullor të ambasadës dhe shkaktoi dëmtime në këtë pjesë të ndërtesës.
Një dëshmitar, 18-vjeçari Sebastian Toerstad, i cili kaloi me makinë pranë ambasadës në momentin e incidentit, tha se në rrugë kishte një shtresë shumë të dendur tymi dhe se hyrja e ndërtesës ishte dëmtuar.
Autoritetet deklaruan se nuk janë gjetur pajisje të tjera shpërthyese në zonë. Hetimet në vendngjarje janë zhvilluar me ndihmën e qenve të trajnuar, dronëve dhe një helikopteri, ndërsa policia po vazhdon kërkimin për autorët e mundshëm.
