Personalitete të shoqërisë civile, konsiderohen nga partitë politike, vetëm si një nga burimet e prurjeve të reja në prag të zgjedhjeve parlamentare. Tashmë, është bërë një trend që në prag të zgjedhjeve, partitë politike të nisin sezonin e transfereve dhe prezantimit të tyre si prurje të reja. Publiciteti medial që u kushtohet figurave të shoqërisë civile, i bën ato më me peshë gjatë “tranzicioneve” nga shoqëria civile drejt partive politike, shkruan gazeta “Tribuna”.
Por, në bazë të deklaratave të subjekteve politike, shoqëria civile do të jetë vetëm një nga burimet e transfereve. Behar Selimi nga Partia Demokratike e Kosovës, thotë se PDK nuk është e kufizuar në prurjet e reja. “Janë të mirëseardhur edhe figurat nga shoqëria civile, por nuk jemi të kufizuar dhe prurjet do të vijnë edhe nga shtresat tjera shoqërore. Besoj që do të ketë figura autoritative nga mjediset që do të vijnë”, ka thënë Selimi.
Sipas tij, ende është herët të thuhen emrat që do t’i bashkohen PDK-së. “PDK ka dëshmuar se vazhdimisht është përtrirë dhe në të janë përfshirë figura të reja të cilat do jenë personalitete me reputacion dhe me imazh të mirë nga mjediset që do të vijnë” ka theksuar Selimi.
