Presidenti i Shteteve të Bashkuara të Amerikës, Donald Trump, ka njoftuar se Marina amerikane ka përfunduar me sukses operacionin për largimin dhe shkatërrimin e të gjitha minave që ndodheshin në ujërat ndërkombëtare të Ngushticës së Hormuzit.
Përmes një deklarate në rrjetin social Truth, Trump theksoi se autoritetet ushtarake e kanë informuar për përfundimin e plotë të këtij misioni delikat në një nga korridoret detare më jetike në botë për tregtinë e naftës dhe gazit.
“Jam informuar nga Marina e Shteteve të Bashkuara se të gjitha minat janë larguar dhe/ose janë shpërthyer në ujërat ndërkombëtare të Ngushticës së Hormuzit,” shkroi presidenti amerikan.
Politika e tolerancës zero dhe monitorimi satelitor
Në të njëjtën kohë, kreu i Shtëpisë së Bardhë ka dërguar një mesazh të qartë dhe të prerë drejt Teheranit, duke bërë të ditur se Irani është njoftuar zyrtarisht për pasojat. Sipas tij, çdo mjet lundrues apo anije që guxon të vendosë mina të reja në këtë zonë do të shkatërrohet menjëherë dhe në mënyrë sistematike.
Trump shtoi se SHBA-ja mban nën mbikëqyrje çdo metër të ngushticës përmes kapaciteteve të Forcës Hapësinore amerikane.
“Ekziston një politikë e tolerancës zero ndaj vendosjes së minave, e cila është në fuqi të plotë,” përfundoi ai.
Ngushtica e Hormuzit mbetet arteria kryesore e transportit global të energjisë, ndaj çdo lloj kërcënimi apo tensioni në këtë rajon përbën rrezik të madh për stabilitetin e tregjeve ndërkombëtare të naftës.
