Presidentja e Republikës së Kosovës, Vjosa Osmani, ka ftuar në takim partitë politike të vendit, ku pritet të diskutohet dhe të merret vendimi për datën zyrtare të mbajtjes së zgjedhjeve të rregullta lokale.
Këshilltari për media i Zyrës së Presidentes, Bekim Kupina, ka njoftuar përmes një deklarate publike se takimi do të zhvillohet të mërkurën, më 4 qershor 2025.
“Në bazë të kompetencave që i garanton Kushtetuta, Presidentja Osmani ka ftuar subjektet politike në takim të mërkurën, më 4 qershor 2025, për t’u konsultuar për caktimin e datës së zgjedhjeve lokale. Menjëherë pas përfundimit të konsultimeve, Presidentja do të shpallë zyrtarisht datën e zgjedhjeve,” ka deklaruar Kupina.
Sa i përket orarit të saktë të mbajtjes së takimit, deri më tani nuk është dhënë ndonjë informacion zyrtar.
Takimi i paralajmëruar vjen në një kohë kur partitë politike tashmë kanë filluar përgatitjet e brendshme për garën lokale dhe janë në pritje të caktimit të datës përfundimtare, në mënyrë që të nisin zyrtarisht fushatat e tyre dhe të përgatiten për një proces zgjedhor të rregullt dhe gjithëpërfshirës.
