Nëse shqiptarët nga lagjja e Kroit të Vitakut duhet të kërkojnë leje për t’i rindërtuar shtëpitë e djegura në pronat e tyre, kjo nuk vlen edhe për serbët. Këta të fundit kanë filluar t’i ndërtojnë dy objekte shumëkatëshe banesore në këtë lagje.
Veprimet e serbëve kanë irrituar banorët shqiptarë, pasi këta të fundit nuk po lejohen nga serbët të vazhdojnë ndërtimet.
Kompanisë së kontraktuar për t’i rindërtuar shtëpitë e shqiptarëve, disa ditë më parë i është ndërprerë puna, në ndërtim e sipër të gjashtë shtëpive shqiptare.
“Punimet janë ndërprerë nga serbët të cilët u bllokuan rrugën me kamion”, thotë përfaqësuesi i lagjes, Nazmi Azemi.
Në komunën e Mitrovicës së Jugut thonë se paratë për ndërtimin e shtëpive janë siguruar nga fondi “Ndihmo edhe ti”, por ndërtimet u ndërprenë dhe tash po priten veprimet e institucioneve të shtetit, në mënyrë që rindërtimi i shtëpive të vazhdojë.
Kryenegociatorja në bisedimet me Serbinë, Edita Tahiri, tha për RTK-në se do të zhbëhen të gjitha punimet të cilat janë zhvilluar pas moratoriumit në veriun e Mitrovicës.
RTK-ja u përpoq të mësojë më shumë rreth objekteve të larta të serbëve që po ndërtohen në këtë lagje. Kryetari i Mitrovicës së veriut, Goran Rakic, kishte premtuar se do të deklarohet në, por ai nuk iu përgjigj thirrjeve telefonike.
Burime të RTK-së thonë se strukturat paralele serbe janë të interesuara t’i blejnë pronat e shqiptarëve për të ndërtuar banesa kolektive.
Në lagjen “Kroi i Vitakut” ka pasur përplasje mes shqiptarëve dhe serbeve, që kur kanë filluar të ndërtohen shtëpitë e shqiptarëve.
Sipas të dhënave të KMDLNJ-së në Mitrovicë, nga paslufta e deri me tani, në veriun e Mitrovicës janë uzurpuar 1400 prona të shqiptarëve. /RTK/
