Dogana e Kosovës ka ndërmarrë një tjetër aksion të suksesshëm në pikat kufitare, duke parandaluar një rast të mosdeklarimit të mjeteve monetare. Gjatë kontrolleve të detajuara në pikën e kalimit kufitar në Merdare, autoritetet doganore kanë zbuluar dhe sekuestruar 63,400 euro të padeklaruara.
Aksioni u zhvillua gjatë kontrollit të autobusëve që hynin në territorin e Kosovës, ku u ndalua për kontroll të imtësishëm edhe një autobus që qarkullonte në linjën Gjermani–Kosovë.
Sipas njoftimit zyrtar, paratë e fshehura janë gjetur brenda bagazhit personal të vetë drejtuesit të autobusit.
“Mjetet monetare janë ndaluar, ndërsa rasti është iniciuar për trajtim të mëtejmë në përputhje me legjislacionin në fuqi,” thuhet në njoftimin e Doganës së Kosovës.
Autoritetet doganore kanë shfrytëzuar rastin për t’i rikujtuar të gjithë udhëtarëve dhe transportuesve se bartja e shumave të mëdha të parave përtej kufirit është e detyrueshme të deklarohet sipas kërkesave ligjore në fuqi. Po ahtu, u bë e ditur se kontrollet e shtuara dhe rigoroze në të gjitha pikat kufitare do të vazhdojnë me intensitet, me qëllim parandalimin e transportit të paligjshëm të parave dhe luftimin e formave të tjera të kriminalitetit ndërkufitar.
