Në vitin 2009, Özdemir Bayraktar, një nga figurat kyçe të industrisë teknologjike turke, pësoi një këputje të aortës dhe u shtrua në njësinë e kujdesit intensiv të një spitali në Stamboll. Gjatë kësaj periudhe kritike, ai u vizitua nga miku i tij i afërt dhe bashkudhëtari politik e intelektual, kryeministri i atëhershëm i Turqisë, Rexhep Tajip Erdogan.
Vizita u shndërrua në një moment historik për industrinë turke të mbrojtjes. Djemtë e Özdemirit, Selçuk dhe Haluk Bayraktar, shfrytëzuan praninë e Erdoganit për t’i prezantuar idenë e tyre ambicioze: zhvillimin dhe prodhimin vendor të mjeteve ajrore pa pilot. Selçuk Bayraktar ishte ulur në të majtë të Erdoganit, ndërsa vëllai i tij më i madh, Haluk, në të djathtë, duke shpjeguar projektin që do të ndryshonte rrjedhën e historisë së teknologjisë ushtarake turke.
Özdemir Bayraktar kishte besuar në këtë vizion shumë përpara këtij momenti. Që nga vitet e ish-kryeministrit Necmettin Erbakan, ai ishte i bindur se Turqia duhej të zhvillonte teknologji strategjike vendore për të siguruar pavarësinë dhe sovranitetin e saj. Në atë kohë, një pjesë e madhe e burokracisë turke ishte skeptike dhe favorizonte blerjen e dronëve nga jashtë, veçanërisht nga Izraeli.
Megjithatë, familja Bayraktar – Özdemiri, bashkëshortja e tij dhe dy djemtë – nuk u tërhoqën. Përmes kompanisë Baykar, ata arritën të revolucionarizojnë industrinë e dronëve, jo vetëm në Turqi, por edhe në nivel global. Modele si Bayraktar TB2, Akıncı TİHA dhe projekti i avancuar i dronit luftarak Kızılelma e kanë vendosur Turqinë në mesin e liderëve botërorë të kësaj industrie.
Sot, Baykar është një nga eksportuesit më të mëdhenj të dronëve në botë, me produkte të përdorura nga dhjetëra shtete dhe të dëshmuara në konflikte reale. Özdemir Bayraktar, i cili ndërroi jetë në vitin 2021, ia kushtoi jetën bindjes se Turqia kishte nevojë për këtë teknologji për të realizuar ëndrrën e saj strategjike.
Zoti e mëshiroftë Özdemir Bayraktarin, njeriun që hodhi themelet e një epoke të re për industrinë turke të mbrojtjes.
