Gjykata Themelore e Kosovës ka vendosur masën e paraburgimit prej 30 ditëve për dyzet të arrestuarit që dyshohen se kanë marrë pjesë në luftimet në Siri dhe Irak përkrahë organizatave të shpallura terroriste si ISIS dhe Al-Nusra, nën dyshimin se kanë kryer vepra penale nga kapitulli “Veprat penale kundër rendit kushtetues dhe sigurisë së Republikës së Kosovës.
Avokati Besnik Berisha, i ka thënë KosovaPress-it se ky që është një lajmi keq për vetë imazhin e Kosovës sepse gjykata nuk ka arrit të ketë fakte se këta persona janë marr me veprime që i vihen barrë, në anën tjetër konfirmon edhe dështimin e institucioneve të sigurisë të cilat deri më tani nuk kanë arritur të pengojnë ose të parandalojnë veprimet të tilla.
“Sa i përket ligjshmërisë së vendimit, një vendim i tillë është i ligjshëm por nuk përmban arsye të mjaftueshme ligjore, në veçanti nuk përmban arsye specifike, individuale dhe konkrete për secilin të pandehur veç e veç. Sigurisht që në fazat e më vonshme, ky aktvendim mund të prishet nga Gjykata e Apelit dhe çështja të kthehet në rivendosje”, ka thënë ai.
Ai ka paralajmëruar se do të ofrojë ankesë brenda afatit dhe pret që ky vendim të ndryshohet në favor të klientit të tij. /KP/
Arsyetimi i Gjykatës
Gjykata Themelore e Prishtinës, nëpërmjet një kumtese ka bërë të ditur se pse vendosi ta pranojë kërkesën e Prokurorisë Speciale për caktimin e paraburgimit 30 ditësh për të dyshuarit për terrorizëm.
Gjykata konstatoi se të gjithë të akuzuarit në të kaluarën e afërt kanë udhëtuar jashtë Kosovës duke shkuar edhe në Siri, për t’u kthyer përsëri, ndërsa ekziston rreziku i arratisjes së tyre nëse ndodhen në liri teksa zhvillohen hetime kundër tyre.
Gjykata vendosi t’i mbajë të burgosur të dyzetët edhe për faktin se ata mund të dënohen jo më pak se pesë vjet nëse vërtetohen veprat penale për të për veprat me të cilat ngarkohen.
Si rrethanë rënduese gjatë vendosjes për caktimin e paraburgimit u konstatua edhe mundësia e të dyshuarve për ndikim në dëshmitarë dhe falsifikim provash.
Në kumtesë gjithashtu thuhet se të dyshuarit duke qenë se i takojnë një grupi të përbashkët kriminal, po të liroheshin do të përbënin rrezik për kryerjen e sërishme të veprave për të cilat ngarkohen.
Gjykata kërkon nga mediet që për informata rreth kësaj çështjeje t’i drejtohen Prokurorisë së Shtetit, përkatësisht Prokurorisë Speciale, pasi derisa çështja është nën hetim përfaqësues të Gjykatës Themelore nuk do ta komentojë rastin.
Ndaj shqiptimit të masës prej 30 ditësh paraburgim, palët mund të ankohen gjatë 24 orëve të ardhshme.