Qendra e Studentëve në Prishtinë ka njoftuar për ndryshime të përkohshme në shërbimet e mensës dhe orarin e hyrje-daljeve në konvikte gjatë muajit të shenjtë të Ramazanit.
Sipas njoftimit zyrtar, për syfyr mensa do të ofrojë shujta të thata të paketuara. Studentët mund t’i marrin këto shujta çdo ditë gjatë orarit të drekës, në një linjë të veçantë ushqimi të dedikuar për këtë qëllim.
“Këto shujta mund t’i merrni çdo ditë gjatë orarit të drekës, në një linjë të veçantë ushqimi të dedikuar për këtë qëllim”, thuhet në njoftim.
Ndërkaq, për iftar, për shkak të numrit të madh të studentëve, ushqimi do të jetë i disponueshëm edhe në formë të paketuar, në mënyrë që studentët ta marrin me vete dhe ta konsumojnë në dhomat e konvikteve.
“Për të shmangur mbingarkesën e hapësirave të brendshme, në të gjitha linjat do të servohet edhe ushqim i paketuar, duke ju mundësuar ta merrni me vete dhe ta konsumoni në dhomat tuaja në konvikte”, theksohet më tej.
Gjithashtu, për të lehtësuar përgatitjet për syfyr, hyrje-daljet në konvikte do të lejohen nga ora 03:00 deri në përfundim të kohës së syfyrit. Ky ndryshim është i përkohshëm dhe synon t’u mundësojë studentëve të sigurojnë ushqim ose nevoja të tjera gjatë kësaj kohe.
Pas përfundimit të muajit të Ramazanit, orari i rregullt i hyrje-daljeve do të rikthehet në fuqi.
Në fund të njoftimit, Qendra e Studentëve ka falënderuar studentët për mirëkuptimin dhe bashkëpunimin, duke uruar: “Me fat dhe shëndet gjatë muajit të madhërishëm të Ramazanit!”
