Këshilli Kombëtar i Austrisë pritet të votojë sot miratimin përfundimtar të ligjit që ndalon mbajtjen e shamisë së kokës nga vajzat nën moshën 14 vjeçare në institucionet arsimore. Ky propozim ka kaluar tashmë fazat paraprake të procedurës parlamentare dhe ka siguruar mbështetjen e një shumice të gjerë politike, duke e bërë miratimin e tij pothuajse të sigurt.
Në votimin paraprak të zhvilluar në Komisionin e Arsimit, pro ndalimit votuan partitë qeverisëse – Partia Popullore Austriake (ÖVP), Partia Socialdemokrate e Austrisë (SPÖ) dhe NEOS – si dhe Partia e Lirisë (FPÖ), e cila përfaqëson krahun e djathtë nacionalist. I vetmi subjekt politik që votoi kundër ishte Partia e Gjelbër, duke argumentuar se ligji cenon të drejtat fetare dhe përfshin rreziqe diskriminuese.
Ndalimi i shamisë nuk është përpjekja e parë e autoriteteve austriake për të rregulluar çështjen. Në vitin 2020, një ligj i ngjashëm u miratua nga koalicioni ÖVP–FPÖ, por u rrëzua nga Gjykata Kushtetuese. Gjykata vlerësoi se ndalimi i atëhershëm shkelte parimin e trajtimit të barabartë dhe lirinë fetare, pasi ai prekte në mënyrë të njëanshme vajzat muslimane, duke e konsideruar legjislacionin diskriminues. Sipas Ministrit aktual të Arsimit, Christoph Wiederkehr, drafti i ri ka marrë parasysh vërejtjet kushtetuese dhe përmban arsyetime më të forta juridike që pritet të përmbushin standardet e Gjykatës.
Megjithatë, masa e re shoqërohet me kritika. Fatma Akay-Türker, kryetare e Shoqatës së Grave Muslimane në Austri, e cila vetë e ka hequr shaminë dhe kundërshton detyrimin për ta mbajtur atë, argumenton se ndalimi mund të rëndojë tek vajzat e reja. Sipas saj, shumë prej tyre përballen me presione të forta familjare dhe mund të ndodhen midis dy qasjeve konfliktuale – kërkesave të shtetit dhe normave të komunitetit. Ajo paralajmëron se vendimi mund të shkaktojë tensione dhe vështirësi në jetën e përditshme të vajzave muslimane.
Zbatimi i ligjit do t’i lihet shkollave, të cilat pritet të ndjekin procedura të qarta me prindërit. Në rast shkeljeje, fillimisht do të zhvillohet një takim sqarues me familjen. Nëse prindërit vazhdojnë t’i dërgojnë vajzat në shkollë me shami, parashihen gjoba që variojnë nga 150 deri në 800 euro, ose, në raste ekstreme, dënim me burgim deri në dy javë.
