Kryeministri i Kosovës, Isa Mustafa, priti në takim zëvendës drejtorin për Evropë të Fondit Monetar Ndërkombëtar, Athanasios Arvanitis.
Ai u shpreh i kënaqur që për herë të parë në Kosovë po mbahen takimet vjetore të konstituencave, grupeve të vendeve anëtare, të Bankës Botërore dhe FMN-së.
Mustafa theksoi reformat domethënëse që po ndërmerren në rritjen e qëndrueshme ekonomike të vendit, thuhet në njoftimin e Kryeministrisë.
“Kosova po bën progres të mirë në shumë fusha, duke përfshirë ruajtjen e stabilitetit makroekonomik, financave të qëndrueshme publike dhe tregut të qëndrueshëm financiar”, citohet të ketë thënë kryeministri.
Sipas këtij njoftimi, zëvendës drejtori për Evropë i Fondit Monetar Ndërkombëtar, Athanasios Arvanitis, vlerësoi progresin në Kosovë, duke shprehur përkrahjen e mëtejme të FMN-së.
Source: Informacione
