Trafikimi i qenieve njerëzore në Zvicër është biznes në të cilin fjalën kryesore e kanë kosovarët.
Në 25 për qind të rasteve të zbuluara të këtij trafiku kanë qenë shtetasit kosovarë ata që kanë pasur dorë në këtë veprimtari, konstatohet në raportin vjetor të Policisë federale të Zvicrës për vitin 2013.
Sipas raportit vjetor të Policisë federale të Zvicrës për vitin 2013, trafikimi prej kohësh ka marrë forma më të sofistikuara. Ai nuk bëhet më vetëm përmes kalimit ilegal të kufirit por gjithnjë më shumë përmes dokumenteve të falsifikuara.
Këto dokumente nuk shërbejnë vetëm për hyrje të thjeshtë brenda kufijve të Zvicrës por tashmë shërbejnë edhe për sigurimin e qëndrimit të rregullt në këtë vend.
Sa i përket prejardhjes së njerëzve të përfshirë në trafikun me qenie njerëzore, sipas raportit të përmendur, ky delikt paraqet biznes të leverdishëm veçanërisht në Kosovë. Kosovarët përbëjnë 25 % të akuzuarve për këtë veprimtari në Zvicër, duke shtuar praninë e tyre me 6 për qind vetëm brenda vitit të fundit. Vendin e dytë, me një përqindje dukshëm më të ulët e zënë sirianët me 5 për qind.
Por nuk janë vetëm trafikantët e Kosovës ata që bëjnë përqindjen më të lartë. Po ashtu edhe në mesin e viktimave të trafikut me qenie njerëzore kosovarët zënë vendin e parë, me 40 për qind.
Sipas Policisë Federale, numri i madh i kosovarëve të përfshirë shpjegohet me diasporën shumë të madhe nga Kosova në Zvicër.
“Familjet kosovare janë të rrjetëzuara shumë mirë në gjithë Evropën. Ndryshe nga mafia italiane, këto “rrjete kriminale” kanë një hierarki më pak të zhvilluar.
Synim kryesor i këtyre rrjeteve është shpërlarja e parave në Zvicër në mënyrë që pastaj në Kosovë të blejnë objekte ose ndërtime luksoze, shkruan “aargauerzeitung.ch” duke iu referuar raportit të përmendur.
Trafikimi me njerëz është bërë atraktiv për këto grupe për faktin se sjell fitime të mira ndërkohë që rreziku për tu ndjekur penalisht është më i vogël.
Me synimin për të luftuar trafikimin me qenie njerëzore, Policia Federale e Zvicrës ka theksuar më shumë rolin që ka pozicioni i atasheut policor të Zvicrës në Kosovë.
Një marrëveshje bilaterale në mes të Zvicrës dhe Kosovës pritet që në vitin e ardhshëm do të mundësojë që ky pozicion të marrë edhe fuqi operative përtej kufijve”. /albinfo
