Drejtori i Arsimit në Komunën e Prishtinës, Jusuf Thaçi ka treguar se ka vizituar sot disa shkolla të nënta në Prishtinë ku është mbajtur testi i arritshmërisë.
Por, Thaçi ka thënë se aty ka parë gjithçka tjetër përveç regull.
“Vizitova të gjitha qendrat e testimin në Prishtinë dhe nëpër klasat e testimit bëhej zhurmë, nxënësit komunikonin me njëri-tjetrin, nxënësit ngriheshin nga vendi i tyre, ishte i mundur kopjimi, aty këtu përdoreshin edhe telefonat, etj., etj..”, ka treguar Thaçi, në një postim në Facebook.
Ai ka rekomanduar që menjëherë të themelohet një mekanizëm për mbajtjen e testeve kombëtare e cila pastaj do të vlerësonte realisht secilin nxënës.
“Urgjentisht duhet të themelohet Qendra Shtetërore për Vlerësim dhe Standarde dhe ajo duhet të ketë kuadro e mjete të duhura për të administruar të gjitha testet nacionale në përputhje me procedurat, kriteret dhe standardet ndërkombëtare. Deri atëherë, na mbetet vetëm të vajtojmë se në çfarë gjendje jemi dhe të hamendësojmë se çfarë rezultatesh vërtet janë duke arritur nxënësit”, ka shtuar ai.
Lexojeni të plotë reagimin e Drejtorit të Arsimit në Komunën e Prishtinës, Jusuf Thaçi:
Sot u mbajt Testi i Arritshmërisë për klasët e 9-a.
.
Dhe…?!
.
Çfarë të them, veçse thënien Cezariane (të modifikuar): “Vajta, Pashë, u Lemerisa!”.
.
Vizitova të gjitha qendrat e testimin në Prishtinë dhe nëpër klasat e testimit bëhej zhurmë, nxënësit komunikonin me njëri-tjetrin, nxënësit ngriheshin nga vendi i tyre, ishte i mundur kopjimi, aty këtu përdoreshin edhe telefonat, etj., etj..
.
Më e keqja është se e gjithë kjo shihej si e zakonshme e si normale nga shumica e nxënësve, administratorëve dhe anëtarëve të komisioneve. Si duket, i vetmi që kishte probleme me perceptimin isha unë!
.
Edhe më keq se kjo është fakti që nga krejt kjo më së shumti pësojnë nxënësit e mirë, për dy arsye:
1. Ata pengohen nga zhurma dhe nga nxënësit e tjerë që ju kërkojnë ndihmë dhe kësisoj nuk mund të japin maksimumin e tyre në test, dhe
2. Nxënësit më të dobët se ata (për shkak të atyre që u sipër-përmenden) mund të marrin pikë afërsisht sa edhe vet nxënësit e mirë dhe kësisoj zyrtarisht dalin të barabartë.
.
Dikush mund të pyes se përse nuk keni ndërmarrë masa!
Ja përse:
Problemi nuk është tek organizimi, meqë parimisht organizimi ishte në nivel, por problemi është te mentaliteti i të gjithë të përfshirëve në këtë proces (nxënësit, administratorët e komisionet), për të cilët të gjitha këto lëshime janë normale dhe të tolerueshme. E për fat të keq, ky mentalitet nuk mund të ndryshohet brenda ditës me ndonjë masë apo me ndonjë vendim.
.
Dikush mund të pyes se përse nuk po e anuloni testin!
Ja përse:
Vetëm për Komunën e Prishtinës duhen mbi 300 administratorë për ta administruar si duhet testin. Kurse, dhe kjo është për keqardhje, në mbarë Kosovën nuk mund të gjejmë as 50 administratorë profesionistë që kanë kualifikime, përvojë dhe ndjeshmërinë e nevojshme për të qenë administratorë të testimeve. Andaj, edhe po të anulohej testi i sotshëm, nuk kam në dorë ndonjë mekanizëm apo resurs për të organizuar një testim tërësisht korrekt e profesional në këto kushte e rrethana.
.
Dikush mund të pyes se çfarë duhet të bëjmë atëherë!
Ja çfarë:
Urgjentisht duhet të themelohet Qendra Shtetërore për Vlerësim dhe Standarde dhe ajo duhet të ketë kuadro e mjete të duhura për të administruar të gjitha testet nacionale në përputhje me procedurat, kriteret dhe standardet ndërkombëtare. Deri atëherë, na mbetet vetëm të vajtojmë se në çfarë gjendje jemi dhe të hamendësojmë se çfarë rezultatesh vërtet janë duke arritur nxënësit.
.
.
“Zot dënoi, sepse do duhej ta dinin se çfarë po bëjnë!” /Indeksonline/