Java e Integritetit 2025 po i afrohet përmbylljes, ndërsa sot vëmendja përqendrohet në një ndër temat kyçe për forcimin e transparencës dhe sundimit të ligjit në vend: sinjalizimin në sektorin publik dhe privat. Agjencia për Parandalimin e Korrupsionit (APK), në bashkëpunim me Forumin Konsultativ me Shoqërinë Civile, po organizon aktivitetin qendror të ditës së pestë, i cili synon të theksojë rolin jetik të sinjalizuesve në mbrojtjen e interesit publik.
Në njoftimin e saj, APK thekson se sinjalizuesit shpesh janë individë të padukshëm në sytë e publikut, por që me guxim, përgjegjësi dhe integritet kontribuojnë në identifikimin dhe parandalimin e shkeljeve brenda institucioneve publike dhe ndërmarrjeve private. Për këtë arsye, diskutimet e sotme do të fokusohen në rëndësinë e mekanizmave të sinjalizimit, funksionalitetin e tyre dhe sfidat e vazhdueshme që shoqërojnë procesin.
Sipas Agjencisë, institucionet publike dhe bizneset private në vend vazhdojnë të përballen me vështirësi të mëdha në fushën e integritetit institucional. Në këtë kontekst, mënyra se si trajtohen sinjalizimet, mbrojtja ligjore e sinjalizuesve, si dhe funksionimi efektiv i mekanizmave për raportimin e shkeljeve, mbeten çështje të një rëndësie të veçantë.
Ngjarja e sotme pritet të shërbejë si një platformë debati ndërmjet institucioneve shtetërore, organizatave të shoqërisë civile, përfaqësuesve të sektorit privat dhe akterëve të tjerë relevantë. Qëllimi është të identifikohen sfidat praktike në zbatimin e legjislacionit aktual, të shkëmbehen përvoja dhe të propozohen masa për përmirësimin e sistemit të sinjalizimit në Kosovë.
APK thekson se siguria dhe mbrojtja e sinjalizuesve mbetet prioritet, pasi çdo rast i trajtimit të gabuar të sinjalizimit ose çdo formë hakmarrjeje ndaj sinjalizuesve minon besimin e qytetarëve në institucionet publike dhe sistemin e drejtësisë.
Me këtë aktivitet, Java e Integritetit 2025 vijon të nxisë një kulturë të transparencës, llogaridhënies dhe përfshirjes së shoqërisë në proceset e forcimit të integritetit në vend.
