Banorët e Teheran janë zgjuar me re të dendura dhe reshje të pazakonta shiu që dukeshin të përziera me naftë, pasi sulmet izraelite goditën depot e karburantit në kryeqytetin iranian.
Sipas raportimit nga korrespondenti i CNN, Fred Pleitgen, në qytet po binte shi i errët pas bombardimeve që goditën vendet e magazinimit të naftës.
“Ju mund të shihni se shiu, uji i shiut, është në të vërtetë i zi dhe duket se është i përzier me naftë”, raportoi Pleitgen nga Teherani.
Forcat e Mbrojtjes së Izraelit njoftuan se kishin goditur objektet e shpërndarjes së karburantit në Teheran të shtunën në mbrëmje. Sipas ushtrisë izraelite, këto objekte furnizonin me karburant konsumatorë të ndryshëm, përfshirë edhe struktura ushtarake në Iran.
Në një deklaratë, ushtria izraelite theksoi se sulmi është pjesë e përpjekjeve për të dëmtuar më tej infrastrukturën ushtarake të regjimit iranian.
Sulmet janë pjesë e një vale të re goditjesh që synojnë burimet energjetike të Iranit.
Ndërkohë, presidenti i Shteteve të Bashkuara të Amerikës, Donald Trump, ka hedhur poshtë kërcënimet e zyrtarëve iranianë të sigurisë, duke deklaruar se nuk është i shqetësuar dhe duke sinjalizuar se sulmet ndaj Iranit mund të intensifikohen gjatë fundjavës.
