Franca pritet të mbajë samitin e sigurisë mbi kërcënimin e grupit Boko Haram, pas rrëmbimit të mbi 220 vajzave nga një shkollë në Nigeri, në muajin prill.
Presidenti nigerian Goodluck Jonathan dhe liderë të tjerë të Afrikës Perëndimore do të ndjekin bisedimet që do të zhvillohen në Paris.
Jonathan kishte në plan të vizitonte të premten qytetin veri-lindor ku vajzat u rrëmbyen, por e anuloi vizitën për arsye sigurie. Ai e ka përjashtuar opsionin e bisedimeve për lirimin e vajzave, bënë të ditur më herët burime të afërta me të.
Ndërkohë, familjarët e nxënëseve bënë thirrje të premten për lirimin e tyre të pakushtëzuar, pasi Boko Haram publikoi një video që tregonte mbi 100 vajza, të cilat do të liroheshin në këmbim të lirimit të të burgosurve.
Presidenti francez Francois Hollande pritet të hapë punimet e samitit më vonë gjatë së shtunës. Liderë nga vendet fqinje të Nigerisë, si Benini, Kameruni, Nigeri dhe Çadi pritet të marrin gjithashtu pjesë, bashkë me përfaqësues nga SHBA, Britania dhe Bashkimi Evropian, transmeton TCH.
Në një deklaratë për shtyp thuhet se delegatët në samit do të diskutojnë mbi strategjitë për t’u përballur me kërcënimin që përbën Boko Haram dhe grupe të tjera terroristë në zonat e Afrikës Perëndimore dhe Qendrore.
Presidenti Hollande të premten diskutoi problemin në një bisedë telefonike me homologun amerikan Barack Obama. Lirimi i sigurtë i 223 vajzave po trajtohet me prioritet nga Shtetet e Bashkuara, që kanë dërguar grupe specialistësh dhe dronë për operacionet për lirimin e tyre. /TG
