Sipas burimeve të Televizionit të Prizrenit, drejtori komunal për ekonomi dhe financa në Prizren, Mehmet Bytyçi, është arrestuar para 4 ditësh nga njësia për trafikim me qenie njerëzore nën dyshimin e bazuar për abuzim seksual me një të mitur.
Gjithashtu, sipas këtyre burimeve, nën masën e arrestit është edhe një femër me mbiemrin Bytyçi, e cila sipas këtyre burimeve ka qenë ndërmjetësuese mes drejtorit të arrestuar dhe të miturës 16 vjeçare, e cila është pjesëtare e një komuniteti pakicë.
Sipas burimeve tona, njësia për trafikim me qenie njerëzore prej kohësh ka përcjellë drejtorin Bytyçi, i cili dyshohet se është zënë në flagrancë. Habit fakti, pse një ngjarje e këtillë është mbajtur në fshehtësi nga organet kompetente siç janë policia dhe gjykata.
Por edhe Kryetari i Prizrenit, Ramadan Muja ka shkarkuar nga posti i drejtorit të Drejtorisë së Financave, të pandehurin.
Hapja e një rasti policor ndaj drejtorit të Drejtorisë së Financave në Komunën e Prizrenit, Muhamet Bytyç, me dyshimin se ka ngacmuar seksualisht një vajzë të mitur, ka bërë që Kryetari Ramadan Muja të marrë vendim për shkarkim nga detyra, drejtorin në fjalë.
“Ky vendim është marrë në bazë të Aktvendimit të Gjykatës Themelore në Prizren, pasi që i është caktuar një muaj në arrest shtëpiak”, thuhet në vendimin e Mujës.
“I pandehuri është i detyruar që t’i dorëzojë të gjitha pajisjet e Drejtorisë së Financave”, raporton PrizrenPress.
