Është arrestuar A. K. (1997) dhe Sh. R. (1997) me dyshimin për vjedhje të 11 pompave të ujit në vlerë prej 3 mijë eurove dhe të njëjtit janë ndaluar në polici për 24 orë.
Sipas njoftimit të policisë, dy ditë më parë në stacionin policor në Klinë është lajmëruar rasti i ‘vjedhjes së rëndë’ të kryer në rr. “Skënder Rexhepi” në Klinë, tek ‘HIDRO –FATI’, ku kryesit e panjohur kishin vjedhur 11 copë pompa të ujit, vlera e të cilave është rreth 3000 euro.
“Gjatë hetimeve intensive të menjëhershme, hetuesit tek parku i qytetit tek ‘Malishgani’ kanë vërejtur dy të dyshuar së bashku me një veturë të tipit ‘Mercedes’. Pas verifikimit të veturës ka rezultuar se vetura ishte me targa të keqpërdorura dhe ishte pa regjistrim dhe menjëherë e njëjta është konfiskuar nga zyrtarët policorë. Pastaj, gjatë kërkimit të gjësendeve të vjedhura, në një shkurre të dyshuarit i kishin fshehur 11 copë pompa uji të cilat i kishin vjedhur në dyqanin e cekur më lart. Të njëjtat janë tërhequr nga vendi i ngjarjes dhe me urdhër të prokurorit të shtetit i janë kthyer viktimës, (pronarit) shtetasit shqiptar të Kosovës F. K. (1986)”, thuhet në njoftim.
Rasti është duke u hetuar dhe do të procedohet në Prokurorinë e shtetit.
