Një veturë e Prokurorisë Speciale të Kosovës është aksidentuar në rrugën Mitrovicë – Prishtinë, në afërsi të fshatit Llazarevë. Sipas policisë, në veturë ka qenë një person, i cili menjëherë është dërguar në QKUK.
Florije Ahmeti, zëdhënëse e policisë i tha KALLXO.com se policia ka informata se i lënduari është në gjendje të rëndë.
“Është vetëaksident, ku shoferi ka humbur kontrollin dhe ka dalë prej rrugës dhe vetura është përplasur në një shtyllë betoni”, tha Ahmeti.
Sipas saj, vetura e aksidentuar është një “Chevrolet” ngjyrë të zezë.
Prokuroria Speciale e Kosovës ka konfirmuar aksidentin.
Liridona Kozmaqi, zëdhënëse e Prokurorisë Speciale të Kosovës, tha për KALLXO.com, se i lënduari në këtë aksident është një vozitës i Prokurorisë, i cili ka qenë në detyrë zyrtare duke dërguar disa dokumente nga Prishtina për në ndërtesën e Prokurorisë së Mitrovicës, e vendosur në Vushtrri.
Kozmaqi tha se vozitësi ka qenë i vetëm në veturë, ndërsa nga informacionet e fundit, edhe ajo konfirmon se gjendja e vozitësit është e rëndë dhe se ai është në trajtim mjekësor në QKUK.
Shefi i ndërrimit në Qendrën Emergjente, Avdush Bajgora, tha se pacienti është pranuar në gjendje të rëndë dhe se ai mbetet në ekzaminim të mëtutjeshëm. / KALLXO.com/