Ministri i Jashtëm i Serbisë, Ivica Daçiç ka deklaruar sot se më 15 janar do të mbahet konferenca e parë e Këshillit të Përhershëm të OSBE-së, e cila do të shënojë fillimin zyrtar të kryesimit të Serbisë në këtë organizatë, raporton Anadolu Agency (AA).
Me këtë rast ministri i Jashtëm serb ka folur për objektivat e politikës së jashtme të Serbisë për vitin e ardhshëm, ku qëllimi kryesor strategjik do të jetë integrimi evropian i Serbisë, me ndërtimin e marrëdhënieve më të mira me vendet që nuk janë anëtare të BE-së, dhe që janë miq tradicional të Serbisë, të tilla si Rusia.
“Një çështje shumë e rëndësishme të cilës ne do t’i kushtojmë vëmendje është ruajtja e stabilitetit rajonal dhe relaksim dhe normalizim i marrëdhënieve me vende të ndryshme të rajonit tonë, veçanërisht me ato më të afërta, me fqinjët tanë, në mënyrë që të shmangim zgjimin e disa konflikteve dhe në mënyrë që ngadalë të zgjidhim problemet e mbetura nga e kaluara”, tha Daçiç.
I pyetur të komentojë nëse marrëdhëniet mes Serbisë dhe Gjermanisë janë rrezikuar pas deklaratave të fundit të komisionerit për zgjerimin e BE-së, Johanes Hahn, dhe disa deklaratave të presidentit Tomisllav Nikoliç, që para Serbisë është vendosur kusht i qartë i njohjes së Kosovës si shtet i pavarur para hyrjes në BE, Daçiç tha se marrëdhëniet mes këtyre dy vendeve nuk janë në rrezik dhe se është në interesin e të gjithëve të jenë parimor dhe për këtë temë të tregohet maturi .
“Është më se e qartë rreth të cilës çështje ne nuk pajtohemi me vendet e shumta dhe pika themelore është të shikojmë se rreth të cilave ne pajtohemi. Pajtohemi rreth faktit se Gjermania përfaqëson partnerin tonë shumë të rëndësishëm dhe që në përputhje me këtë duhet të eliminohen të gjitha këto probleme”, tha nënkryetari i parë i Qeverisë së Serbisë.
Në fund Daçiç theksoi se pa marrë parasysh se çfarë ka thënë komisioneri Hahn, qëndrimi i BE-së nuk mund të jetë që Serbia, për të hyrë në BE, duhet ta njeh pavarësinë e Kosovës, sepse këtë nuk e kanë bërë as disa prej anëtareve të Bashkimit Evropian.
