Kina ka kritikuar ashpër presidentin e Filipineve, Ferdinand Marcos Jr, pasi ai sugjeroi se vendi i tij mund të përfshihej në një konflikt të mundshëm mes Kinës dhe Shteteve të Bashkuara për çështjen e Tajvanit.
Gjatë një vizite zyrtare në Indi këtë javë, Marcos tha për median indiane Firstpost se afërsia gjeografike e Filipineve me Tajvanin dhe prania e madhe e komunitetit filipinas atje do ta detyronin vendin të ndërhynte në rast lufte.
“Nëse ka një luftë të hapur, atëherë ne do të përfshihemi. Ka shumë, shumë shtetas filipinas në Tajvan dhe kjo menjëherë do të ishte një problem humanitar,” tha Marcos.
Në përgjigje, Ministria e Jashtme e Kinës publikoi të premten një deklaratë të ashpër, duke paralajmëruar Manilën të mos “luajë me zjarrin” dhe duke i bërë thirrje të respektojë parimin e “një Kine të vetme”.
“Afërsia gjeografike dhe prania e madhe e popullsisë jashtë vendit nuk janë justifikim për ndërhyrje në punët e brendshme të të tjerëve,” thuhet në reagim.
Tensione të shtuara në Detin e Kinës Jugore
Marrëdhëniet mes Kinës dhe Filipineve janë përkeqësuar vitet e fundit për shkak të mosmarrëveshjeve territoriale në Detin e Kinës Jugore. Të dyja palët akuzojnë njëra-tjetrën për provokime, duke përfshirë përplasje me anije, përdorim të ujëhedhësve dhe madje edhe armë si shtiza e thika gjatë incidenteve detare.
Pekini këmbëngul se Tajvani është pjesë e territorit të tij dhe një provincë e shkëputur, një pretendim që Taipei e kundërshton. Kina e akuzoi Marcosin se po minon ligjin ndërkombëtar dhe Kartën e Shoqatës së Kombeve të Azisë Juglindore (ASEAN), duke thënë se komentet e tij rrezikojnë paqen rajonale dhe interesat e popullit filipinas.
Aleanca të reja dhe manovra ushtarake
Vizita e Marcos në Indi solli nënshkrimin e marrëveshjeve të reja të sigurisë për forcimin e bashkëpunimit mbrojtës mes dy vendeve, duke përfshirë ushtrinë, forcat ajrore dhe flotën detare. Kohët e fundit, anijet luftarake indiane nisën patrullime të përbashkëta me marinën filipinase në Detin e Kinës Jugore – një veprim që pritet të zemërojë Pekinin.
Në një tjetër shenjë tensioni, këtë javë zyrtarët filipinas dënuan lëshimin e një rakete kineze, mbetjet e së cilës dyshohet se ranë pranë një province perëndimore, duke shqetësuar banorët dhe duke rrezikuar anijet e avionët lokalë. Nuk u raportuan dëme apo të lënduar.
Pesha e SHBA në konflikt
Përshkallëzimi i përplasjes detare ka përfshirë gjithnjë e më shumë edhe Shtetet e Bashkuara, të cilat kanë një traktat të mbrojtjes reciproke me Filipinet. Uashingtoni ka riafirmuar angazhimin për të mbrojtur forcat dhe mjetet filipinase – përfshirë rojen bregdetare, avionët dhe anijet publike – nëse ato sulmohen kudo në Detin e Kinës Jugore.
