Agjërimi është një mënyrë ushqyerjeje që përfshin kufizimin ose shmangien e ushqimit për periudha të caktuara kohore. Një nga format më të njohura është agjërimi me ndërprerje (intermittent fasting). Edhe pse nuk është i përshtatshëm për të gjithë, ai mund të sjellë disa përfitime domethënëse për shëndetin.
1. Kontroll më i mirë i sheqerit në gjak
Studimet sugjerojnë se agjërimi me ndërprerje ndihmon në përmirësimin e kontrollit të glukozës në gjak te personat me diabet dhe ata në rrezik për diabet të tipit 2. Në një studim, individët me para-diabet patën ulje të ndjeshme të sheqerit dhe triglicerideve në gjak pas një periudhe agjërimi. Në një tjetër studim, 90% e pjesëmarrësve ulën dozën e barnave për diabet, ndërsa mbi gjysma arritën në remisje të diabetit pas tre muajsh agjërim.
2. Ulje e inflamacionit
Agjërimi mund të reduktojë inflamacionin kronik, i cili lidhet me shumë sëmundje kronike. Një rishikim shkencor tregoi se agjërimi uli ndjeshëm nivelet e një markuesi të rëndësishëm inflamator në gjak. Gjithashtu, njerëzit që agjëruan për një vit patën më pak inflamacion dhe faktorë rreziku për sëmundje të zemrës krahasuar me ata që nuk agjëruan.
3. Humbje peshe
Agjërimi ndihmon në reduktimin e kalorive ditore, stimulon përdorimin e yndyrës si burim energjie dhe ndikon te hormonet e urisë për të rritur ndjesinë e ngopjes. Një rishikim tregoi se personat që ndoqën këtë model ushqyerjeje humbën nga 3 deri në 5 kg brenda 10 javësh. Humbja e peshës ka varijuar nga 0.8% deri në 13% të peshës trupore në një periudhë 2 deri në 26 javë.
4. Rritje e hormonit të rritjes
Agjërimi rrit nivelet e hormonit të rritjes, i cili është thelbësor për metabolizmin, forcën muskulore dhe mirëmbajtjen e peshës. Studimet sugjerojnë se ky hormon mund të rritet ndjeshëm pas vetëm 24 orësh agjërim, madje edhe dhjetëfish pas 37.5 orësh.
5. Përmirësim i shëndetit të zemrës
Agjërimi në ditë alternuese ka ndihmuar në uljen e kolesterolit total dhe faktorëve të rrezikut për sëmundjet e zemrës te personat mbipeshë. Ai gjithashtu ka treguar efekt në uljen e presionit të gjakut dhe të kolesterolit LDL (i keq). Megjithatë, kërkohen më shumë studime afatgjata për të konfirmuar këto përfitime.
6. Shëndet më i mirë i trurit
Studimet te kafshët tregojnë se agjërimi mund të mbrojë shëndetin e trurit duke ndihmuar qelizat nervore dhe funksionin njohës. Gjithashtu mund të ndihmojë në parandalimin e sëmundjeve neurodegjenerative, si Alzheimeri. Por këto përfundime kanë nevojë për verifikim përmes studimeve klinike te njerëzit.
7. Rrezik më i ulët për disa lloje kanceri
Agjërimi lidhet me përmirësim të funksioneve metabolike dhe humbje peshe, çka mund të ndikojë në uljen e rrezikut për disa sëmundje, përfshirë disa lloje kanceri. Ekspertët besojnë se përmirësimi i faktorëve të stilit të jetesës përmes agjërimit mund të ndikojë pozitivisht edhe në parandalimin e kancerit. Megjithatë, shumica e këtyre studimeve janë bërë te kafshët dhe kërkohen më shumë prova te njerëzit.
8. Shëndet dhe jetëgjatësi më e mirë
Disa kërkime fillestare kanë lidhur agjërimin me përmirësimin e jetëgjatësisë dhe të asaj që quhet “shëndetgjatësi” – koha që njeriu jeton në shëndet të mirë. Agjërimi mund të ndihmojë në reduktimin e faktorëve të rrezikut për sëmundje kronike, mbështet funksionin e sistemit imunitar, përmirëson florën bakteriale të zorrëve dhe aktivizon procese kundër plakjes. Por nevojiten më shumë studime për ta konfirmuar këtë.
