Bitcoin ka kaluar për herë të parë vlerën rekord prej 120 mijë dollarësh mëngjesin e së hënës, duke shënuar një moment historik për kriptomonedhën më të madhe në botë, në një kohë kur investitorët janë të mbushur me shpresa për politika fiskale më të favorshme ndaj aseteve dixhitale.
Sipas të dhënave të CoinGecko, çmimi i Bitcoin u ngjit deri në 122,838 dollarë, ndërsa aktualisht po tregtohet për 122,568 dollarë.
Në Shtetet e Bashkuara, Dhoma e Përfaqësuesve pritet të zhvillojë një debat kyç ditën e sotme mbi një paketë projektligjesh që synojnë të krijojnë më shumë qartësi ligjore dhe rregullatore për industrinë e kriptoaseteve.
Përkrahja e industrisë së kriptomonedhave është një nga premtimet politike të presidentit amerikan Donald Trump, i cili është vetëquajtur “presidenti i kriptos”. Ai ka bërë thirrje publike ligjvënësve që të rishikojnë bazën rregullatore aktuale dhe të krijojnë një mjedis më të favorshëm për inovacionin dixhital financiar.
Çmimi i Bitcoin ka shënuar një rritje prej 29% vetëm gjatë këtij viti, duke nxitur një valë optimizmi në mbarë tregun e kriptove. Ether, kriptomonedha e dytë më e madhe pas Bitcoin-it, është rritur në 3,059 dollarë — niveli më i lartë në pesë muajt e fundit. Ndërkohë, XRP dhe Solana kanë shënuar rritje me 3% secila.
Sipas të dhënave të CoinMarketCap, kapitali total i tregut të kriptomonedhave ka arritur në 3.81 trilionë dollarë.
Këtë muaj, Uashingtoni shpalli javën e 14 korrikut si “Java e Kriptomonedhave”, ku Kongresi pritet të votojë për disa akte kyçe: Aktin Genius, Aktin për Qartësi në Kripto dhe Aktin kundër Shtetit të Mbikëqyrjes përmes CBDC-ve (monedhave dixhitale të bankave qendrore) — nisma që mund të përcaktojnë të ardhmen e rregullimit të kriptove në SHBA.
