Ëndrra e madhe e legjendës së futbollit francez, Zinedine Zidane, për të drejtuar kombëtaren e tij është bërë tashmë realitet. Federata Franceze e Futbollit ka emëruar ish-kapitenin dhe fituesin e Kupës së Botës si pasardhës të Didier Deschamps, duke i besuar atij drejtimin e ekipit përmes një kontrate katërvjeçare.
Ky vendim vjen vetëm dy javë pasi përfundoi epoka e gjatë e Deschamps në krye të pankinës franceze, e cila u mbyll pas vendit të katërt në Kupën e Botës dhe një humbjeje dramatike 6-4 kundër Anglisë.
“E vetmja gjë që doja të bëja ishte kombëtarja franceze,” u tha Zidane gazetarëve gjatë prezantimit të tij. “E kam parë gjithmonë këtë skuadër përmes syve të një trajneri të ardhshëm. Për këtë arsye nuk pranova asnjë punë në ndonjë klub. E vetmja gjë që doja pas Real Madridit ishte të menaxhoja kombëtaren e Francës.”
Zidane, 54 vjeç, zbuloi se kishte planifikuar gjithçka që kur Deschamps kishte marrë vendimin e tij në janar të vitit 2025. Pas takimit me presidentin e federatës, marrëveshja u finalizua me sukses. Ai pritet ta nisë aventurën e re në krye të “Gjelave” me një ndeshje si mysafir ndaj Turqisë në Ligën e Kombeve, për t’u pasuar më pas nga sfidë shtëpiake kundër Italisë në “Stade de France” më 2 tetor.
Nga ana e tij, Didier Deschamps largohet pas plot 14 vitesh në krye të kombëtares, periudhë gjatë së cilës drejtoi 185 ndeshje dhe arriti 120 fitore. Ai hyri në historinë e futbollit francez duke fituar Kupën e Botës 2018, Ligën e Kombeve 2020-21, si dhe duke u kualifikuar në finalet e Euro 2016 dhe Botërorit 2022.
Zidane dhe Deschamps ndajnë një lidhje të fortë historike, pasi dikur kanë qenë bashkëlojtarë në triumfin e paharruar të Francës në Kupën e Botës 1998, ku vetë Zidane ishte figura kyçe që fitoj edhe “Topin e Artë” në të njëjtin vit.
